कांस्य विजेता पलेशालाई भव्य स्वागतसहित नगरपरिक्रमा गराइने

ऐतिहासिक पदक जितेकी पलेशासहित प्रशिक्षक कविराज नेगी लामासहित टोलीलाई राष्ट्रिय खेलकुद परिषद्, नेपाल तेक्वान्दो संघ, पारा ओलम्पिक कमिटीले त्रिभुवन विमानस्थलमा विशेष स्वागत गर्ने भएको छ ।

नेपालले अन्तर्राष्ट्रिय खेलकुदको ओलम्पिक संरचनामा पहिलो पटक आधिकारिक पदक जितेको हो । पारा तेक्वान्दो खेलाडी पलेशा गोवर्धनले के–४४ क्याटगोरीअन्तर्गत महिला ५७ केजीमुनि सर्बियाकी मारिया मिसेभलाई १५–८ स्कोरले हराएर कांस्य जितेकी थिइन् ।

नेपालले ग्रीष्मकालीन ओलम्किमा सन् १९६४ को टोकियोदेखि सहभागिता जनाएको हो । त्यसमा अहिलेसम्म पदक जित्न सकेको छैन । सन् १९८८ को सोल ओलम्पिकको प्रदर्शनी खेलमा तेक्वान्दोले कांस्य जितेको थियो । सन् २००४ को एथेन्स पारा ओलम्पिकदेखि नेपालले भाग लिए पनि पदक जित्न सकेको थिएन ।

राष्ट्रिय खेलकुद परिषद्ले मंगलबार विज्ञप्तिमार्फत पेरिस पारा ओलम्पिकमा कांस्य जितेको नेपाली तेक्वान्दो टिमलाई नगरपरिक्रमासहित भव्य स्वागत गर्ने कार्यक्रम तय गरेको जनाएको छ ।

त्रिभुवन अन्तर्राष्ट्रिय विमानस्थलबाट बाजागाजाका साथ सहर परिक्रमा गराइने भएको छ । र्‍यालीको रुटमा एयरपोर्ट, गौशाला, पुरानो बानेश्वर, मैतीदेवी, डिल्लीबजार, बागबजार, भद्रकाली, सहिदगेट, त्रिपुरेश्वर चोक हुँदै राष्ट्रिय खेलकुद परिषद् परिसरमा विशेष कार्यक्रम गरी स्वागत र बधाई ज्ञापन गरिने जनाइएको छ ।

पलेशाको निरन्तरको मिहिनेत, लगन र उच्च मनोबलले गरिएको प्रदर्शनबाट प्राप्त सफलताप्रति नेपाली खेलकुदक्षेत्र हर्षविभोर हुनुका साथै अन्तर्राष्ट्रिय खेलकुद क्षेत्रमा नेपालको सान शिखरमा पुगेको राखेप प्रचारप्रसार प्रमुख खुशराज दाहालद्वारा जारी विज्ञप्तिमा उल्लेख छ ।