सुदूरपश्चिमले ल्यायाे ३१ अर्ब ६२ करोडको बजेट

आर्थिक मामिला मन्त्री बहादुरसिंह थापाद्वारा सोमबार प्रदेश सभामा प्रस्तुत बजेट वक्तव्यमा पुँजीगततर्फ १८ अर्ब ७६ करोड २५ लाख २३ हजार अर्थात् ५९.३२ प्रतिशत विनियोजन गरिएको छ । चालुतर्फ १२ अर्ब ८५ करोड ७४ लाख ५ हजार ४०.६५ प्रतिशत विनियोजित छ । एक करोड वित्तीय व्यवस्थामा राखिएको छ ।

अघिल्लो सरकारका आर्थिक मामिला मन्त्री सुरेन्द्रबहादुर पालले गत असार १ गते प्रदेश सभामा पेस गरेको बजेट वक्तव्य र बजेटसँग सम्बन्धित अन्य विधेययहरू फिर्ता लिने प्रस्ताव पारित भएको छ । त्यसलगत्तै वर्तमान आर्थिक मामिला मन्त्री थापाले बैठकमा आर्थिक वर्ष ०८१/८२ को बजेट वक्तव्यको प्रस्तुति सुरु गरेका हुन् ।

तर प्रतिपक्षी दल माओवादी केन्द्र र एकीकृत समाजवादीका सांसदहरूले भने बजेट ल्याउने प्रक्रिया असंवैधानिक रहेको भन्दै बैठक बहिष्कार गरेका थिए । उनीहरू बैठक कक्षबाट बाहिरिएपछि प्रतिपक्षी बेञ्चमा राप्रपाकी सांसद खेमादेवी विष्ट र स्वतन्त्र सांसद तारा जोशी मात्र रहेका थिए ।