भारत उत्तराखण्डको सोनप्रयागमा पहिरोमा परी एक नेपालीको मृत्यु

रुद्रप्रयाग–गौरीकुण्ड मार्गमा पर्ने सोनप्रयाग नजिकै अबेर साँझ पहिरोमा परी ५ जनाको मृत्यु भएको हो । जसमा ४ जना भारतीय नागरिक रहेका छन् । केदारनाथको दर्शन गरेर फर्किने क्रममा उनीहरु पहिरोमा परेका हुन् । पहिरोमा परेका ३ जनाको उद्धार गरिएको छ । जसमा एक जना नेपाली समेत परेका छन् । मृतक पाँचै जनाको शव पहिरोबाट निकालेर पोष्टमार्टमका लागि अस्पताल लगिएको छ ।

करिब दुई साताअघि उक्त क्षेत्रमा भीषण वर्षा भएको थियो । त्यतिबेला सोनप्रयाग नजिकै १ सय ५० मिडर सडक पहिरोले बगाएको छ । उक्त क्षेत्रमा पैदल आउजाउ बन्द गरिएको छ । अमर उजालाका अनुसार सोमबार पनि भीषण वर्षाको पूर्वानुमानसँगै उक्त क्षेत्रमा आउजाउमा रोक लगाइएको थियो । तर पनि तीर्थालुहरु अटेरी गरेर आउजाउ गर्दा उक्त दुर्घटना भएको हो ।

दिल्लीस्थित नेपाली दूतावासले पहिरोमा परी एकजनाको मृत्यु भएको खबर प्राप्त भएपनि पूर्ण विवरण आइनसकेको जनाएको छ । दूतावासका काउन्सलर उमा प्रसाद चर्तुवेदीले पहिरोमा ५ जनाको मृत्यु भएको र १ जना नेपाली समेत परेको खबर प्राप्त भएको बताए ।

दुई साताअघि मात्रै केदारनाथ नजिकै फाटा हेलिप्याड भन्ने ठाउँमा पहिरो जाँदा ४ जना नेपाली कामदारको मृत्यु भएको थियो ।