भेरीको भेलमा दाउरा निकाल्ने चटारो

उर्लेदो भेलमा लठ्ठीको सहाराले दाउरा तान्न सिपालु रोका मात्रै होइनन्, धेरै स्थानीयले यसैगरी दाउरा तान्ने जुक्ति लगाउने गरेका छन् ।

बलियो लौरोमा लामो काटी ठोकेर बल्छीमा माछा मारेझै गरेर दाउरा तान्न बालक, वृद्ध, युवा, महिला प्रायः सबै भेरीको तटमा पुग्ने गरेका छन् । विमला भन्छिन्, ‘दाउरा पाउने वन गाउँदेखि टाढा छ । जान सम्भव हुन्न । बर्खामा नदीमा बगेर आएका दाउरा तान्न सके बर्षभरी पुग्छ ।’

बर्षा बढी भएको दिन नदीमा काठदाउरा बगेर आउने भएकाले उनीहरु बिहानै बगरमा गएर बस्ने गरेका छन् । स्थानीय राजेशकुमार पुनले भेरी बढेपछि आफूहरु खुसी हुने बताए । बस्ती नदीको समिपमै भए पनि अहिलेसम्म यसले नोक्सानी नगरेको पनि राजेश बताउँछन् । बर्खामा भेरीको भेलले यसरी दाउरा र काठपात बगाएर ल्याउने र हिउँदमा यही भेरीमा माछा मारेर गुजारा चलाउने गरेको स्थानीय बताउँछन् ।