मिटरब्याज पीडितको गुनासो : 'न्याय पाउन मुस्किल भयो'

मिटरब्याज समस्याविरुद्धमा संघर्ष गर्दै आएको दुई संघर्ष समिति एकता भएर बनेको मिटरब्याजविरुद्ध किसान मजदुर आन्दोलन, नेपालको गोलबजारमा शनिबार आयोजित सिरहा जिल्ला भेलामा पीडितहरूले यस्तो गुनासो गरेका हुन् । उनीहरूले कानुन कागजमै सीमित हुँदा न्याय पाउनै मुस्किल भएको गुनासो सुनाए । 'हाम्रो संघर्षपछि आयोग बन्यो, कानुन बन्यो, तर सबै कागजमै सीमित छ,' आन्दोलनका प्रवक्ता निर्ग नवीनले भने, 'सरकार र संयन्त्र नै निर्दयी छन् ।'

उनले अब चाँडै गृहमन्त्रीसँग यस विषयमा भेटवार्ता हुन गइरहेको र त्यसपछि पनि सरकारको व्यवहार ठीक नदेखिए सशक्त संघर्ष थाल्ने चेतावनी दिए । 'मिटरब्याजको संरक्षक राजनीतिक दलहरू नै हुन्,' उनले भने, 'रबैया सुधार नभए वारपारको लडाइँ हुन्छ ।'

आन्दोलनका महासचिव मनोजकुमार पासवानले सरकार, संयन्त्र र मिटरब्याजीहरूले आफूहरूको संयमतालाई कमजोरी बुझेको गुनासो गरे । 'उनीहरूले हामीलाई पटक-पटक हिंस्रक हुन उक्साइरहेका छन्,' उनले भने, 'उनीहरूले हामीमाथि दमन गरिरहेका छन् ।'

आन्दोलनका अध्यक्ष अवधेश कुशवाहाले मिटरब्याजीले प्रहरी, प्रशासन र सरकार सबैलाई प्रभावमा पारेर न्याय प्रक्रियालाई अवरुद्ध पारेको आरोप लगाए । 'मिटरब्याजीसँग टन्नै पैसा हुन्छ, तर पीडितसँग छैन,' उनले भने, 'सारा सिस्टम मिटरब्याजीको प्रभावमा परेर पीडितमाथि थप दमन गरिरहेका छन् ।'

आन्दोलनका अगुवा रामरिझन यादव भने अहिलेका सबै दल र तिनका नेताहरू नै मिटरब्याजी भएको र त्यसैकारण यो समस्या जटिल बनेको तर्क गरे । 'सबै दल नै मिटरब्याजी छन्,' उनले भने, 'तर, यस्तो धेरै चल्दैन, उनीहरूले श्रीलंका र बंगलादेशबाट पाठ सिकुन् ।'