पुरिँदै गंगापूर्ण हिमताल- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

पुरिँदै गंगापूर्ण हिमताल

समयमै चासो नदेखाए केही वर्षभित्रै ताल मैदान हुने जोखिममा 
आश गुरुङ

लमजुङ — मानवबस्ती नजिकै भएकाले पर्यटकहरू मनाङको गंगापूर्ण हिमताल सयर गर्न रुचाउँछन् । तर पछिल्लो समय बाढीपहिरोका कारण गंगापूर्ण हिमताल जोखिममा परेको पर्यटन व्यवसायी समिति मनाङका अध्यक्ष विनोद गुरुङले बताए । हिमपहिरो र पछिल्लोपटक आएको बाढीपहिरोले ताल पुरिँदै आएको छ । 

मनाङ ङिस्याङ गाउँपालिका–६ मा पर्ने गंगापूर्ण हिमताल २१ वर्षअघि र अहिले । यो ताल समुद्री सतहदेखि ३,५४० मिटर उचाइमा छ । तस्बिर सौजन्य : विनोद गुरुङ

असार पहिलो साता हिमाली क्षेत्रमा ठूलो पानी पर्‍यो । ‘कहिल्यै पानी नपर्ने हिमालमा यस पटक ठूलो पानी परेपछि हिउँ पगालेर बाढी बनायो । पहिरो चलायो । लेदोले गंगापूर्ण ताल पुरिएको छ,’ उनले भने । ताल मनाङकै सान र मुटु भएकाले नै पर्यटक यो ताल नघुमी नफर्कने उनले बताए । तर, जलवायु परिवर्तन र बर्सेनि बढ्दो वर्षाका कारण तालमा बालुवा, हिलोमाटोले पुरिँदै गएको छ । केही साताअघिको वर्षाले तालको अधिकांश भाग पुरिएको उनले बताए ।

‘अब पनि यो तालको संरक्षणमा चासो देखाइएन भने केही वर्षमा मैदानमा परिवर्तन हुनेछ,’ उनले भने, ‘ताल जोगाउन स्थानीय तह, अन्नपूर्ण संरक्षण क्षेत्र आयोजना (एक्याप) लगायतलाई भने पनि पहल भएन ।’

मनाङ ङिस्याङ गाउँपालिका–६ मा पर्ने गंगापूर्ण हिमताल [२१ वर्षअघिको अवस्था] । तस्बिर सौजन्य : विनोद गुरुङ

वडाध्यक्ष सोनाम गुरुङका अनुसार ताल साँघुरिएको छ । ‘यस पटकको बाढीपहिरोले ताललाई बित्यासै पार्‍यो । हिमालबाट ढुंगामाटो सबै ल्यायो । बीचसम्म आएको छ,’ उनले भने । ताल जोगाउन छलफल गर्ने, पर्खाल लगाएको भए पनि जोगाउन नसकेको उनले बताए । हिमपहिरो र यस पटकको बाढीपहिरोले ताल जोखिममा पारेको अन्नपूर्ण संरक्षण क्षेत्र आयोजना (एक्याप) इलाका संरक्षण कार्यालय मनाङका प्रमुख लेखनाथ गौतमले बताए । उनका अनुसार तालको आधा भाग पुरिइसकेको छ । ‘अहिले त तालजस्तो पनि देखिँदैन,’ उनले भने, ‘यसको संरक्षणका लागि ठूलै बजेट आवश्यक पर्छ ।’

मनाङ ङिस्याङ गाउँपालिका–६ मा पर्ने गंगापूर्ण हिमताल । तस्बिर सौजन्य : विनोद गुरुङ

गाउँपालिका अध्यक्ष कान्छा घलेका अनुसार तालको संरक्षणका लागि केन्द्रीय सरकारले साढे ४ करोड बजेट विनियोजन गरेको छ । टेन्डर प्रक्रियामा गइसकेको छ । यसबाट हिमालबाट झर्ने बाढीलाई थिग्य्राउन कुनामा चेकड्याम बनाउने, माटो फालेर ताललाई फराकिलो बनाउने, ड्याम बनाउने, वृक्षरोपण गर्नेलगायत योजना छ ।

मनाङ ङिस्याङ गाउँपालिका–६ मा पर्ने गंगापूर्ण हिमताल । तस्बिर सौजन्य : विनोद गुरुङ

यसअघि गाउँपालिकाबाट विनियोजित १० लाख रुपैयाँ र पर्यटन बोर्डबाट प्राप्त १० लाख रुपैयाँ साथै स्थानीयको श्रमदानबाट संरक्षणका लागि करिब १ सय मिटर पर्खाल लगाएको उनले बताए । समुद्री सतहबाट ३ हजार ५ सय ४० मिटर उचाइमा रहेको गंगापूर्ण मनाङ ङिस्याङ गाउँपालिका–६ मा पर्छ ।

प्रकाशित : श्रावण ७, २०७८ १०:४८
प्रतिक्रिया
पठाउनुहोस्

भारतमा कालो ढुसीको संक्रमणबाट ४३०० भन्दा बढीको मृत्यु

इकान्तिपुर डेस्क

काठमाडौँ — भारतमा कालो ढुसी(ब्ल्याक फंगस) को संक्रमणबाट ४ हजार ३ सयभन्दा बढीको मउत्यु भएको छ ।  विशेषगरी कोरोना संक्रमितमा देखिने कालो ढुसीबाट अहिलेसम्म भारतमा ४५ हजार ३ सय ७४ जना संक्रमित भएको भारतीय स्वास्थ्य तथा परिवार कल्याणमन्त्री मनसुख माण्डवीयले जानकारी दिएका छन् ।

स्रोत : स्वास्थ्य मन्त्रालय

कालो ढुसीले नाक, आंखा र मस्तिष्कमा असर पुऱ्याउने चिकित्सकको भनाइ छ । चिकित्सकहरुका अनुसार कोरोना भाइरसबाट संक्रमणमुक्त भएको १२ देखि १८ दिनपछि कालो ढुसीको संक्रमण देखिने सम्भावना हुन्छ ।

बीबीसीका अनुसार अहिले पनि भारतमा झन्डै २२ हजार कालो ढुसीका संक्रमित उपचाररत रहेका छन् ।कालो ढुसीको संक्रमणबाट महाराष्ट्र र गुजरात सबैभन्दा बढी प्रभावित राज्य हुन् । यी दुई राज्यमा १७८५ को कालो ढुसीको संक्रमणबाट मृत्यु भएको छ।

कालो ढुसीबारे जान्नैपर्ने कुरा

कोरोना भाइरसबाट संक्रमित भएका बिरामीमा आँखा, नाक र अनुहार बिगार्ने कालो ढुसी(म्युकरमाइकोसिस) को संक्रमण नेपालमा पनि केहीमा पुष्टि भएको स्वास्थ्य मन्त्रालयले जनाएको छ । यो संक्रमण विरलै देखिने तर संक्रमण गम्भीर भए प्राणघातक पनि हुनसक्ने भएकाले समयमा ध्यान पुर्‍याउन आवश्यक रहेको मन्त्रालयले जनाएको छ । ब्ल्याक फंगससमेत भनेर चिनिने यस रोगको प्रारम्भिक लक्षमा अनुहार, मुख, नाक र आखाँवरिपरि दुख्ने हुन्छ ।

त्यस्तै यसका कारण ज्वरो आउने, आँखा र नाक सुन्निने, रातो हुने वा दुख्ने पनि गर्छ । आँखाको ढकनी सुनिने, र ढकनी झुक्ने, आँखाले धमिलो देख्ने तथा नाकबाट रगत बग्ने, बाक्लो सिँगान आउने र दाँत दुख्ने वा हल्लिने पनि यसको लक्षण भएको मन्त्रालयले जनाएको छ ।

४५ देखि ६५ वर्ष उमेर समूह, मधुमेह वा शरीरको रोग प्रतिरोधात्मक क्षमता कमजोर भएका र धेरै खाले एन्टिबायोटेक वा स्टेरोइड औषधि सेवन गरिरहेकाहरुलाई कालो ढुसीको संक्रमण हुने उच्च जोखिम रहन्छ ।

घरमा आइसोलेसनमा बस्दा यो कालो ढुसीबाट बच्न विभिन्न उपायहरु अपनाउन सकिने चिकित्सकहरुको सुझाव छ । कालो ढुसी एक व्यक्तिबाट अर्को व्यक्तिमा नसर्ने पनि चिकित्सकको भनाइ छ । कालो ढुसीबाट संक्रमित भएकाको उपचारमा ‘एम्फोटेरिसिन–बी’ नामक औषधि प्रयोग गरिन्छ ।

संक्रमण रोकथामका लागि अपनाउनुपर्ने उपायहरु

  • सफा र सुख्खा मास्क प्रयोग गर्ने, डिस्पोजेबल मास्कको पुन: प्रयोग नगर्ने
  • नियमित रुपमा हात धुने वा स्यानिटाइजरको प्रयोग गर्ने
  • व्यक्तिगत स्वच्छतामा ध्यान दिने
  • घरबाहिर वा फोहोरमा काम गर्नु परे डिस्पोजेबल पन्जाको प्रयोग गर्ने
  • धेरै धुलो भएको र ओसिलो ठाउँमा नजाने
  • नुनिलो पानीले नाक सफा गर्ने
  • पोभिडिन आयोडिन भएको तरल पदार्थले घाँटी र मुख कुल्ला गर्ने
  • जथाभावी स्टेरोइड र एन्टिबायोटिक प्रयोग नगर्ने
  • सुगर भएका बिरामीले सुगर नियन्त्रणमा राख्ने
  • स्वास्थ्यकर्मीको सल्लाहमा मात्रै औषधि प्रयोग गर्ने

प्रकाशित : श्रावण ७, २०७८ १०:४२
पूरा पढ्नुहोस्
प्रतिक्रिया
पठाउनुहोस्
×