स्थानीय तह निर्वाचन सकिएको २८ महिनापछि समीक्षा गर्दै कांग्रेस

कांग्रेसले स्थानीय तह केन्द्रीय समन्वय विभाग गठनमा गरेको ढिलाई कारण २०७९ वैशाखमा सम्पन्न निर्वाचन समीक्षा यही भदौ अन्तिमबाट सुरु गर्न लागेको हो । विभागले आफ्नो पहिलो कार्यक्रम वाग्मती प्रदेशको राजधानी हेटौंडाबाट सुरु गर्ने भएको छ ।

कांग्रेस मकवानपुरले बुधबार हेटौंडामा पक्रकार सम्मेलन गर्दै कार्यक्रमको तयारी सुरु भएको जानकारी दिएको छ । ‘पार्टीले स्थानीय तह केन्द्रीय समन्वय विभाग गठन गरेपछि पहिलो फटक हेटौंडामा कार्यक्रम हुन लागेको हो । कार्यक्रममा स्थानीय तहमा वडा, पालिका, नगर र उपमहानगरमा उम्मेदवार भएका सम्पूर्णलाई उपस्थितिका लागि भनेका छौं’,कांग्रेस मकवानपुर सभापति बुद्ध लामाले भने । उनका अनुसार भेलामा स्थानीय तह निर्वाचनको विषयमा समीक्षा र अबको मार्गनिर्देशनबारे छलफल हुने छ । ‘अब विभागले देशैभर स्थानीय तहका उम्मेदवारसँग अन्तक्रिया गर्नेछ,’ उनले भने ।

यही भदौ ३० गते हुने भेलालाई केन्द्रीय महामन्त्री विश्वप्रकाश शर्माले सम्बोधन गर्ने कार्यतालिका रहेको छ । यस विभागको प्रमुखमा कांग्रेस केन्द्रीय सदस्य मधु आचार्य रहेका छन् ।