शरदयाम पर्खिरहेका गाउँघर [तस्बिरहरु]

लहलह बयेली खेलिरहेका हरियाली धान खेतमा पहेँलो रङ भरिँदै छ । बर्खे फलहरु लटरम्म फुलेका छन् । सयपत्री र मखमली फुल्ने सुरसार छ । मनसुनी बाढी र पहिरोले अवरुद्ध बनेका ग्रामीण मार्गहरु पुन: संचालनमा आउन थालेका छन् । क्षितिजहरु खुलेका छन् ।

निलो आकाशमा कहींकतै देखिने बादलका थुम्काहरु र भर्खरै स्नान गरेजस्तो देखिने हरियो धर्तीका दृश्यहरु आकर्षक छन् । भदौरे झरीको सट्टा गर्मीको अनुभूत गर्न सकिन्छ । त्यसैले होला, गाईवस्तुहरु पनि ठाउँ-ठाउँमा आहाल बसेका देखिन्छन् । वर्षात्‌को समाप्ति र शरदको आगमन पर्खिरहेका गाउँघर निकै सुन्दर र रमणीय देखिएका छन् । मानिसको चहलपहल भने निकै कम देखिन्छ ।