सहकारी ठगलाई कारबाही हुनैपर्छ

प्रतिनिधिसभामा पेस गरेको प्रतिवेदन प्रतिनिधिसभाले कार्यान्वयनका लागि सरकारलाई पठाएको समाचार आएको छ । यति हुँदाहुँदै पनि रवि र राष्ट्रिय स्वतन्त्र पार्टीले सहकारी ठगीको आरोपबाट रवि लामिछानेले ‘क्लिन चिट’ पाएको दाबी गरिरहेका छन् । छानबिन समितिले भने कम्पनीमा बहाल रहँदा सहकारीबाट कम्पनीमा आएको रकमको जिम्मेवार सञ्चालकहरू जीबी, रवि, छवि र रम्तेल हुने हुँदा प्रचलित कानुनबमोजिम कारबाही हुनुपर्ने भनी सरकारलाई सिफारिस गर्ने प्रतिवेदन बुझाएको छ ।

कांग्रेस नेता धनराज गुरुङको पनि उनकी पत्नीमार्फत सहकारीकै ठगी प्रकरण आएको छ । के सहकारी त्यस्तो संस्था हो, जहाँ जतिसुकै गल्ती गरे पनि उजागर नहुने बलियो रक्षाकबच छ ? जेहोस् सहकारी वा अन्य जुनसुकै संस्थाका ठग वा प्रकरणका अपराधीलाई यो वा त्यो दल नभनी अपराध गरेको अपराधी मात्र हेरेर कानुनबमोजिम सख्त कारबाही गर्नैपर्छ । अनि मात्र भविष्यमा ठगी/अपराधजन्य क्रियाकलाप गर्नबाट पछि हट्नेछन् ।
– गंगाराज अर्याल, पाणिनि–८, अर्घाखाँची