रास्वपा प्रतिवेदन : कांग्रेस-एमाले साना दलको अस्तित्व मेटाउन लागे, वैकल्पिक शक्तिबीच ध्रुविकरण आवश्यक

रास्वपाको दुई दिन काठमाडौंमा चलेको प्रथम राष्ट्रिय भेलाले सभापति रवि लामिछानेको राजनीतिक प्रतिवेदन पास गर्दै वैकल्पिक शक्तिहरू एक ठाउँमा आउनुपर्ने प्रस्ताव अघि बढाएको हो ।

'सरकार सहयात्री कांग्रेस र एमालेले मुलुकलाई दुई दलीय व्यवस्थामा लैजाने प्रपञ्च गरिरहेकाले राजनीतिक ध्रुविकरणको आधार बन्दै गएको छ । व्यवस्थापकीय सुधार र राजनीतिक स्थिरताको बहनामा उनीहरू साना दलको अस्तित्व मेटाउने योजनामा छन् । संभावित यो कदमले वैकल्पिक राजनीतिक शक्ति बन्न चाहने नयाँ दल र शक्तिहरूलाई ढिलो-चाँडो सहकार्यका लागि एकै ठाउँमा ल्याउन सक्छ' प्रतिवदेनमा छ,''वाद' र 'विचार'को संक्रिणता नरहेको, देश-जनताको हितलाई केन्द्रमा राखेको तथा गुण-दोषका आधारमा संघर्ष र सहकार्यको नीति रहेका कारण वैकल्पिक राजनीतिक शक्ति निर्माणको अगुवाई हामी गर्न सक्छौं ।'

राष्ट्र, राष्ट्रियता र जनजीविकाका मुद्दामा सहकार्यसहित लोकतान्त्रिक अभ्यासविरुद्ध हुन सक्ने चलखेल र राज्य र सरकार सिर्जित विकृति- विसंगतिको खबरदारीका लागि सार्थक मोर्चाबन्दी जरुरी रहेको पारित प्रस्तावमा छ । 'त्यसैले, 'वाद' र 'विचार'को संकीर्णता नरहेका दल, शक्ति, समूह र व्यक्तिलाई ध्रुविकरण प्रक्रियाबारे गहन छलफलका लागि आह्वान गर्दछु ।'