कांग्रेस उपसभापति धनराज गुरुङमाथि पनि छानबिन गर्न पत्राचार गर्ने संसदीय छानबिन समितिको तयारी 

सहकारी संस्थाका सञ्चालकबाटै उजुरी परेपछि संसदीय छानबिन विशेष समितिले सहकारीको स्थलगत अध्ययन गरेको थियो । उनीमाथि पनि अनुसन्धान गर्न समितिले राज्यका निकायलाई लेखी पठाउने भएको छ ।

‘यो विषय पनि गम्भीर छ, खासमा धनराज र श्रीमतीबीच भएको सम्बन्धविच्छेदको उद्देश्यमाथि पनि प्रश्न उठेको छ । तर, संसदीय छानबिन समिति गठन हुँदा मितेरी सहकारीको विषय नउठेकाले कार्यादेश (टीओआर) र अनुसूचीमा यो सहकारीको नाम छैन । यद्यपि, राज्यका निकायलाई अनुसन्धानका लागि लेखी पठाउने कुरा भएको छ,’ एक सदस्यले भने ।

धनराजकी श्रीमती ज्योति सहकारीको महाप्रबन्धक रहेकै बेलामा सहकारीको बचत अपचलन भएको सञ्चालकहरूको भनाइ छ । छानबिन समितिका सभापति थापा र सदस्यहरू बिहीबार स्थलगत अध्ययनमा जाँदा सहकारीका अध्यक्ष कुम्भराज गुरुङले सहकारीको कानुनी दायित्वबाट बच्नका लागि मात्रै धनराजले कागजी सम्बन्धविच्छेद गरेको दाबी गरेका थिए । त्यसलाई पुष्टि गर्ने कागजपत्रसमेत उनले समितिलाई बुझाएका छन् ।

धनराज दम्पतीले २०७६ फागुन २९ मा अदालतबाट सम्बन्धविच्छेद गरेका थिए । तर, २०७७ फागुन ३ मा मितेरी सहकारीबाटै १२ लाख रुपैयाँ ऋण लिँदा धनराजले हकवालाका नाममा ज्योतिकै नाम लेखेका थिए ।