राजनीतिक स्थिरताका लागि संविधान संशोधन आवश्यक : महामन्त्री शर्मा

केन्द्रीय स्थानीय तह समन्वय विभागले हेटौँडामा आइतबार गरेको अन्तरसंवाद कार्यक्रममा बोल्दै महामन्त्री शर्माले संविधान संशोधनको नेतृत्व नेपाली कांग्रेसले नै लिनुपर्ने बताए । उनले भने, ‘मुलुकमा ठूला/ठूला राजनीतिक परिवर्तन कांग्रेसकै नेतृत्वमा भएका छन् । अब मुलुकको रुपान्तरणको जिम्मेवारी पनि कांग्रेसले नै लिनुपर्छ ।’

महामन्त्री शर्माले नयाँ राजनीतिक दलहरूले समेत जनताको चाहनाबमोजिम काम गर्ने लय नसमातेको भन्दै कांग्रेस नै नागरिकको सबैभन्दा विश्वासिलो साथी भएको दाबी गरे । 'दल नयाँ भएर हुँदैन, प्रवृति र चिन्तन नयाँ चाहिन्छ । त्यो नेपाली कांग्रेससँग छ,' उनको दाबी थियो ।

मकवानपुरका स्थानीय तहका जनप्रतिनिधि सहभागी कार्यक्रममा महामन्त्री शर्माले जन्मदेखि मृत्युसम्म कांग्रेसका जनप्रतिनिधिहरूले नागरिकको घर आँगनमा पुगेर साथ दिनुपर्ने बताए । उनले चुनावमा उम्मेदवारकारुपमा गाउँमा पुग्दा गरेका प्रतिबद्धता र घोषणापत्रका बाचा पूरा गर्ने गरी काम गर्न समेत निर्देशन दिए ।