औषधि संक्रमणले मिर्गौला फेल भएकी ‍गेलाललाई क्षतिपूर्ति दिन सांसद गौतमको माग

प्रतिनिधिसभाको मंगलबारको बैठकमा रास्वपा सांसद गौतमले जोरपाटीको अत्तरखेलस्थित नेपाल मेडिकल कलेज (एनएमसी) शिक्षण अस्पतालले शल्यक्रियाका क्रममा प्रयोग गरेको औषधिका कारण गेलालको मिर्गौलामा संक्रमण भई फेल भएको र प्रत्यारोपण गर्नुपरेकाले क्षतिपूर्ति दिनुपर्ने बताइन् ।

अस्पतालले नै गेलालको स्वास्थ्यमा खेलबाड गरेको भन्दै सांसद गौतमले क्षतिपूर्ति माग गरेकी हुन् । 'के भएर गमलाको स्वास्थ्यमा खेलबाड भयो ? क्षतिपूर्ति कसले दिने ? सत्य जान्ने मौका गमलाले कहिले पाउने ?,' उनले भनिन् । गमलालाई स्वास्थ्य उपचारबारे सबै प्रतिवेदन माग गर्दा पनि अस्पतालले नदिएको सांसद गौतमको भनाइ थियो । पछिल्लो समय गेलालको निवेदन नै सरकारी निकायहरूले लिन नमानेको उनको भनाइ छ ।

२०७६ फागुनमा गमला गेलालमाथि उक्त घटना भएको तर लामो समय हुँदा पनि कुनै सरकारी निकायले ध्यान नदिएको र कसैलाई जवाफदेही नबनाएको सांसद गौतमको भनाइ थियो । '२०७६ सालदेखि उहाँको समस्यालाई समाधान गर्न किन कुनै पनि संस्था तयार भएनन् ? स्वास्थ्य मन्त्रालयले बोधार्थ पत्र पाएको थियो, गमलाको स्वास्थ्य के छ ? किन जानकारी लिएन ?

नेपाल मेडिकल काउन्सिलले औषधिमा समस्या नभए के भएर गमलाको किड्नी फेल भयो भनी किन अनुसन्धान गरेन ? न्याय दिने जिम्मा कसको हो ?,' उनले भनिन्, 'जिम्मेवार संस्थामा बस्नेहरूले के गरिबको मुद्दा भुसुनाबराबर ठानेको हो ? गरिबले यो देशमा बाँच्ने हक नै नपाउने हो ? यो देश धनी र पहुँचवालाको लागिमात्र हो ?'

गेलालको जस्तै समस्या अन्यत्र पनि भएको कुरा बुझ्न गौतमले आग्रह गरेकी थिइन् ।

• औषधिकै संक्रमण : ३ जनाको मिर्गौला बिग्रियो