न्याय माग्दै बिनुले थालिन् आमरण अनशन

प्रेम सम्बन्धपछि रामेछापका प्रदीप कठायतसँग विवाह गरेकी बिनुले आफूमाथि श्रीमान् र श्रीमान्‌का आफन्तबाटै बलात्कार भएको भन्दै प्रहरीमा जाहेरी दिएकी थिइन् । तर न्याय नपाएपछि निराश उनी न्यायकै लागि कहिले अदालतअघि प्रदर्शन गरेर गुहार गर्छिन्, त कहिले न्यायाधीशका अगाडि इजलासमै विष पिएर न्याय प्रशासनलाई झकझक्याउँछिन् । तर उनको बोली सुनिएको छैन ।

पटक-पटक संघर्ष गर्दा पनि सरकारले आफूलाई न्याय दिने गरी अनुसन्धान र मुद्दा प्रक्रिया अघि नबढाएको गुनासो गर्ने उनी अहिले ६ बुँदे माग राखेर आमरण अनशनमा बसेकी छिन् । 'शरीरले साथ दिँदासम्म सत्यका लागि लड्नेछु,' उनले सामाजिक सन्जालमा लेखेकी छिन्, 'बाँचे भने यस्ता धेरै माग राखेर सडकमा पीडित साथीहरुको लागि पक्कै आउनेछु । मरे भने मेरो मुद्दाको उठान गरिदिनुहोला ।'

• बिनुले किन इजलासमै विष पिइन् ?

उनले ०७५ सालमा आफूमाथि जबरजस्ती करणी हुँदा कालीमाटी प्रहरीमा दिएको उजुरी जबरजस्ती फिर्ता लिन लगाइएको भन्दै त्यस्तो कार्य गर्ने डिएसपी सुरज कार्कीलाई कारबाही गर्न माग गरेकी छिन् । उनले त्यसबेला मुद्दा फिर्ता गर्न लगाएर विवाहको नाटक रचेको र बलात्कारको हदम्याद सकिएपछि आफूसँग सम्बन्धविच्छेद गरी अलपत्र छोडेर हिँड्ने गरी षड्यन्त्र गरिएको आरोप लगाएकी छन् । उनले आफूलाई न्यायबाट बन्चित गराउने न्यायाधीश र संलग्न अधिकारीहरुलाई समेत अनुसन्धान र कारबाहीको माग गरेकी छन् ।

'मेरो मुद्दामा सुरुदेखि अनुसन्धान गरी उचित न्याय दिलाई पाउँ,' उनले भनेकी छिन्, 'मलाई पटक-पटक बलात्कारको प्रयास गर्ने काका ससुरा पवन कठायत जसको बारम्बार यातना र हिंसाको कारण मैले विषसमेत पिउन बाध्य भएँ, निजलाई नियन्त्रणमा लिई अनुसन्धान र कारबाही गरिपाउँ ।'

काका ससुरा पर्ने कठायतले राजनीतिक पावर र पैसाको भरमा आफूलाई न्यायबाट बन्चित गराएको उनको आरोप छ । 'अदालतमा हुने भनसुन र किनबेच प्रवृत्तिलाई रोक्न राज्यले कडा कदम चालोस्,' उनले भनेकी छिन् । बिनुको आमरण अनशनमा अधिकारकर्मीहरुले समेत समर्थन जनाएका छन् । सामाजिक सन्जालमा उनको मागहरुमा समर्थन जनाउँदै सरकारले उनको मागमाथि अनुसन्धान गरी मुद्दालाई अघि बढाउनसमेत माग गरेका छन् ।

राष्ट्रिय मानव अधिकार आयोगकी पूर्वआयुक्त एवम् अधिवक्ता मोहना अन्सारीले अनशनरत यादवले आफूमाथि भएको हिंसाको प्रतिकार गर्दै प्रहरीमा उजुरी दिएर पनि न्याय नपाएको भन्दै उनको मागको सुनुवाइ हुनुपर्ने बताएकी छिन् । 'बिनु यादव ती तमाम बोल्न नसक्ने महिलाहरुको पनि प्रतिनिधित्व गर्नुहुन्छ । उहाँले आफूमाथि भएको हिंसाको प्रतिकार गर्दै प्रहरीमा उजुरी दिनुभयो । तर उनको त्यो उजुरीमाथि अनुसन्धान नगरी हदम्याद नघाइयो र आज बिनु यो अवस्थामा पुग्नुभएको छ,' उनले सरकारलाई प्रश्न गर्दै भनेकी छिन्, 'न्याय माग्नु अपराध हो ?'