एक वर्षमा १५ करोड रुपैयाँको अचार निर्यात

बजारमा स्वदेशीदेखि विदेशी विभिन्न ब्रान्डमा फरक–फरक स्वादका ‘रेडिमेड’ अचार किन्न पाइन्छ । उत्पादित अचारको खपत बढी मात्रामा आन्तरिक बजारमै हुने भए पनि आर्थिक वर्ष ०७७/७८ देखि विदेशसमेत निर्यात हुन थालेको विभागको तथ्यांकले देखाएको छ । मुलुकबाट लप्सी, मुला, गाँजर, अकबरे खुर्सानीका अलावा बफ, चिकेन, माछालगायतका विभिन्न प्रकारका अचार निर्यात हुने थालेको हो ।

सरकारले अचार निर्यात गर्न आर्थिक वर्ष ०७७/७८ देखि मात्रै ‘राष्ट्रिय शीर्षक’ सिर्जना गरेको थियो । ‘त्यसअघि यस्तो व्यवस्था थिएन, जसले गर्दा अन्य शीर्षकमै अचार निर्यात हुन्थ्यो,’ विभागका सूचना अधिकारी पुण्यविक्रम खड्काले भने, ‘छुट्टै शीर्षक नै बनाएपछि मात्र अचार निर्यातको तथ्यांक राख्न थालिएको हो ।’ कोभिडको बढ्दो संक्रमणका बेला संसारभरकै व्यापार/व्यवसायमा असर परेका अवस्थामा नेपालबाट भने अचार निर्यात सुरु भएको देखिएको छ ।

गत आर्थिक वर्ष सबैभन्दा बढी अस्ट्रेलियामा ६ करोड ८१ लाख ३१ हजार रुपैयाँ, इटालीमा १ करोड ७४ लाख ६० हजार, अमेरिकामा १ करोड ६२ लाख २४ हजार, जापानमा १ करोड १७ लाख २५ हजार र बेलायतमा १ करोड ३ लाख १० हजार रुपैयाँको अचार निर्यात भएको थियो ।

गत आर्थिक वर्ष ७ करोड २१ लाख ६४ हजार रुपैयाँको अचार आयात भएको विभागको तथ्यांक छ । चीनबाट ४ करोड ३३ लाख २९ हजार र भारतबाट २ करोड ८८ लाख १३ हजार रुपैयाँको अचार आयात भएको विभागको तथ्यांक छ ।

आर्थिक वर्ष ०७९/८० मा १० करोड ९८ लाख ४४ हजार रुपैयाँ बराबरको अचार निर्यात भएका थियो । अघिल्लो वर्ष पनि सबैभन्दा बढी अचार जापान, कोरिया, अमेरिका, इटाली र अस्ट्रेलियामा निर्यात भएको छ । आर्थिक वर्ष ०७९/८० मा १० करोड २ लाख १४ हजार रुपैयाँको अचार आयात भएको थियो । सबैभन्दा बढी अचार चीन र भारतबाट अचार आयात भएको विभागको तथ्यांक छ । विभागका अनुसार चीनबाट ७ करोड ६७ लाख ६५ हजार र भारतबाट २ करोड ३३ लाख २८ हजार रुपैयाँको अचार आयात भएको थियो । बाँकी अस्ट्रेलिया र यूएईबाट अचार आयात गरिएको थियो ।

आर्थिक वर्ष ०७८/७९ मा ७ करोड ६४ लाख ६१ हजार रुपैयाँको अचार आयात भएको थियो । सोही वर्ष ३ करोड ८६ लाख ६४ हजार रुपैयाँको अचार निर्यात भएको थियो । आर्थिक वर्ष ०७७/७८ मा २ करोड ५२ लाख ३४ हजार रुपैयाँको अचार आयात हुँदा ३९ लाख २२ हजार रुपैयाँको निर्यात भएको थियो । आर्थिक वर्ष ०७६/७७ मा २९ लाख १३ हजार रुपैयाँको अचार आयात गरिएको थियो ।