विद्यालयमा राजनीति गतिविधि गराउने शिक्षकलाई कारबाहीको चेतावनी 

इकाइ प्रमुख हेमराज खतिवडाले आइतबार सार्वजनिक सूचना गरी विद्यालयमा राजनीति गतिविधि गराउने त्यस्ता शिक्षकलाई नियमानुसार कारबाहीको चेतावनी दिएका हुन् । पछिल्लो केही दिनयता प्रभु साहले नेतृत्व गरेका आम जनता पार्टीका नेताले कलैया उपमहानगरपालिकाका श्री ३ चन्द्र र पन्नादेवी मावि लगायतमा कक्षाकोठामै प्रवेश गरेर विद्यार्थीहरुलाई ‘नो टिचर, नो टिचिङ’ भनी विद्यार्थीहरुसित नारा लगाउन थालिएको भिडियो भाइरल भएपछि इकाइले यस्तो चेतावनी दिएको हो । तर इकाइले ती दलका नाम र त्यस्ता गतिविधि गराउने शिक्षकलाई कस्ता किसिमको कारबाही गर्ने भन्ने सूचनामा उल्लेख गरेको छैन ।

सूचनाको बोधार्थ भने जिल्ला प्रशासन कार्यालयलाई दिइएको छ । ‘राजनीति गतिविधिले बालबालिकाको पठनपाठन प्रभावित भएको सूचना प्राप्त भएपछि चेतावनी दिइएको छ,’ इकाइ प्रमुख खतिवडाले भने, ‘शिक्षकले त्यस्तो गरे/गराएको पाइएमा कारबाही गरिनेछ ।’

विद्यालय शान्ति क्षेत्र राष्ट्रिय ढाँचा कार्यान्वयन निर्देशिका २०६८ मा कुनै राजनीतिक दल वा तिनका भ्रातृ संगठनले राजनीतिक गतिविधि नगर्न/नगराउन व्यवस्था गरेकोले त्यस्ता गतिविधि हुन नदिन सचेत गराइएको उनले बताए ।

तराई/मधेसका धेरैजसो जिल्लामा विद्यार्थीको अनुपातमा शिक्षक दरबन्दी नभएको र शिक्षक पनि पूर्ति नभएकाले विद्यार्थीको पठनपाठनमा समस्या हुने भएकाले शिक्षकको व्यवस्था मिलाउन सरकारलाई दबाब दिने उद्देश्यले ‘नो टिचर, नो टिचिङ’ को अभियान विद्यालयमा सुरु गरिएको आम जनता पार्टीका बारा जिल्लाका स्थानीय नेता उमेश कुसवाहाले बताए ।