पाँचथर — पहिरोको जोखिम बढेपछि पाँचथरको फालेलुङ गाउँपालिका-३ को एउटै टोलका ६ घरका २० जना सदस्य विस्थापित भएका छन् । फालेलुङ-३ पुछार टोलको बस्ती नै जोखिममा पर्ने गरी घर माथि जमिन चर्केपछि यत्तिका घर विस्थापित भएका हुन् ।
जिल्ला प्रहरी कार्यालयका अनुसार पहिरोको जोखिम बढेपछि स्थानीय गौरिभक्त केरुङ, कृष्णबहादुर केरुङ, मदन जवेगू, भीमबहादुर जवेगू, प्रेम केरुङ र जनम केरुङको परिवार विस्थापित भएका हुन् ।
उनीहरुलाई जनप्रतिनिधि र प्रहरीको सक्रियतामा स्थानीय आशिष लावती, सुकदल लावती र मणि लावतीको घरमा सारिएको छ । पहिरोको जोखिम बढेसँगै गौरिभक्तका ५, कृष्णबहादुरका ४, मदनका ४, भीमबहादुका २, प्रेमका २ र जनमको परिवारका ३ गरी २० जना सदस्य विस्थापित भएका हुन् ।
प्रकाशित : असार ३०, २०८१ २०:४०