दुर्गममा स्वास्थ्य पहुँचको अभावले ज्यान गुमाउन नपरोस् भन्दै पाँच दिनदेखि अनशनमा 

दुर्गमका नागरिकलाई आपतकालीन उपचारको सुविधा उपलब्ध गराउन सरकारसँग दुईवटा एयर एम्बुलेन्सको व्यवस्था गर्न माग गर्दै तेह्रथुमका ४२ वर्षीय दीपक सिलवाल शुक्रबारदेखि अनशनमा बसेका हुन् ।

‘विकट क्षेत्रमा प्रसव पीडाले छट्पटिएका सुत्केरी आमा तथा दिदीबहिनीहरू र ज्यान जोखिममा रहेकाहरूको आपतकालीन उद्धार होस् भनेर सरकारको ध्यानाकर्षण गराउन अनशनमा बसेको हुँ,’ उनले भने, ‘आपतकालीन उद्धारका लागि राज्यले कम्तीमा दुईवटा एयर एम्बुलेन्सको व्यवस्था गरोस् भन्ने मेरो माग छ ।’

संवेदनशील अवस्थामा रहेका र समयमै स्वास्थ्य उपचार सेवा नपाएर दुर्गम क्षेत्रका नागरिकले ज्यान गुमाइरहेकाले यस्तो अवस्था नदोहोरिनका लागि अनशनमा उत्रिएको उनको भनाइ छ । यसका लागि सरकारले सबै नागरिकलाई समान पहुँच पुग्ने गरी एयर एम्बुलेन्सको माग गरेको उनले सुनाए ।