२५ हजार नेपालीलाई तत्काल ल्याउने उच्चस्तरीय समितिको निर्णय- समाचार - कान्तिपुर समाचार
कान्तिपुर वेबसाईट
AdvertisementAdvertisement

२५ हजार नेपालीलाई तत्काल ल्याउने उच्चस्तरीय समितिको निर्णय

युएइमा रहेका २८ जना गर्भवती र कुवेतमा माफी पाएर बसेका पहिलो प्राथमिकतामा
दिनको ३ हजारदेखि ३५ सयलाई ल्याइने
बिनु सुवेदी

काठमाडौँ — सरकारले विदेशमा अलपत्र परेका २५ हजार नेपालीलाई प्राथमिकताका आधारमा एक हप्तादेखि १० दिनभित्र ल्याउने भएको छ । कोभिड रोकथाम तथा नियन्त्रण उच्चस्तरीय समन्वयस समितिको शुक्रबारको बैठकले प्राथमिकताको आधारमा तत्काल २५ हजारलाई ल्याउने निर्णय गरेको छ ।

मन्त्रिपरिषद्‍ले यसअघि नै विदेशमा रहेका नेपालीलाई ल्याउने कार्यविधि पारित गरेको छ । पारित कार्यविधि अनुसार समितिले कार्ययोजना बनाएको हो ।

सरकारले भारत र अन्य देशमा गरी झन्डै ६ लाख नेपाली तत्काल आफ्नो देश फर्किन चाहेको बताएको छ । यसमध्ये प्राथमिकताको आधारमा युइए, कतार, मालदिभ्स तथा बंगलादेशमा रहेका विद्यार्थीलगायत परेका छन् । समिति स्रोतका अुनसार युएइमा रहेका २८ जना गर्भवती नेपाली महिला र कुवेतमा लडकडाउनकै अवधिमा माफी पाएर देश फर्किन बसेका २५ सयदेखि ३ हजार घरेलु कामदारलाई पहिलो प्राथमिकतामा राखिएको छ । दैनिक ३ हजारदेखि ३५ सय जनालाई ल्याइने पनि स्रोतले बतायो ।

स्रोतका अनुसार आवश्यकता अनुसार केहीलाई लिन नेपालबाट विमान पठाइनेछ भने केहीलाई उतैको देशसँग समन्वयगरी ल्याइने छ । नेपाल आएपछि दुई दिन उनीहरुले आफ्नै खर्चमा काठमाडौंको होटलमा बस्नुपर्ने छ । अवस्थाहेरी केहीलाई भने सरकारले नै यो सुविधा उपलब्ध गराउने पनि समितिका एक सदस्यले बताए । दुई दिन काठमाडौंमा बसेपछि सबैलाई उनीहरुकै घर भएको स्थानीय तहका क्वारेन्टाइनमा बस्नेगरी पठाइनेछ ।

प्रकाशित : जेष्ठ १६, २०७७ १७:५९
प्रतिक्रिया
पठाउनुहोस्

रोल्पामा चट्याङबाट दुईको ज्यान गयो

काशीराम डाँगी

रोल्पा — चट्याङमा परेर शुक्रबार रोल्पामा दुई जनाको मृत्यु भएको छ । पश्चिमी रोल्पाको त्रिवेणी गाउँपालिका–७ गैरीगाउँमा बिहान सवा ११ बजे परेको चट्याङका कारण दुई महिलाको ज्यान गएको हो । 

प्रहरीका अनुसार चट्याङबाट गैरीगाउँस्थित जङ्डाँडाका २४ वर्षीया आशा बुढा र ७५ वर्षीया उनकी फूपू सासु खिर्मा बाँठामगरको ज्यान गएको हो । खिर्मा माइत आएकी थिइन् भने आशा घरमै थिइन् । घरमै रहेका आशाका पति सविन र काखे बालकलाई केही भएको छैन । घटनापछि सख्त घाइते दुवैलाई लिबाङस्थित रोल्पा अस्पतालमा उपचारका लागि ल्याइएकोमा चिकित्सकले मृत घोषणा गरेका थिए । अस्पताल प्रमुख डा धनमाया घर्तीमगरले दुवैको मृत्यु अस्पताल ल्याइपुर्‍याउनु अघि नै भएको बताइन् ।

घटनालगत्तै उद्धारका लागि प्रहरी घटनास्थल पुगेको रोल्पाका प्रहरी प्रमुख प्रहरी नायव उपरीक्षक चित्रबहादुर गुरुङले बताए । त्रिवेणी गाउँपालिकाका अध्यक्ष शान्तकुमार वलीले चट्याङबाट ज्यान गुमाएकाको परिवारलाई राहत दिनेबारे छलफल थालिएको बताए । मृतक दुवैको पोस्टमार्टम पनि रोल्पा अस्पतालमा गरिएको छ ।

एक महिनाअघि पनि पूर्वी रोल्पामा चट्याङकै कारण दुई पुरुष र केही जनावरको ज्यान गएको थियो ।

प्रकाशित : जेष्ठ १६, २०७७ १७:५६
पूरा पढ्नुहोस्
प्रतिक्रिया
पठाउनुहोस्
×