पहिरोले अवरुद्ध सडक खुल्यो

बुधबारदेखि जोडर प्रयोग गरेर पहिरोले थुपारेका ढुङ्गा हटाइएपछि सडक खुलेको दिक्तेल रूपाकोट मझुवागढी नगरपालिकाका उपप्रमुख विसन राईले बताए।

पहिरोले ठूला–ठूला ढुंगा झारेकाले पन्छाउन समय लागेको राईले सुनाए । मध्यपहाडी लोकमार्गको हुर्लुङबाट उत्तरी क्षेत्र जोडिएको उक्त सडक अवरुद्ध भएपछि उत्तरी क्षेत्रमा पर्ने केपिलासगढी गाउँपालिका, ऐसेलुखर्क गाउँपालिकाबासीको जिल्ला सदरमुकाम दिक्तेल, काठमाडौं, विराटनगर लगायतका शहरहरूसंग सिधा यातायात सम्वन्ध विच्छेद भएको थियो ।

ऐसेलुखर्क गाउँपालिकामा पहिरोले क्षति पुर्‍याएका सडकहरूको पनि मर्मत भइरहेको गाउँपालिका अध्यक्ष गिरेन्द्रबहादुर राईले बताए । उक्त गाउँपालिकामा अवरुद्ध भएको १६ सडकमध्ये १४ वटा खुलाइएको राईले बताए ।

‘ऐसेलुखर्कका ७ वटै वडामा १६ वटा सडक अवरुद्ध भएको थियो’ राईले भने–‘यसमध्ये १४ वटा खुलाइएको छ, जलेश्वरी र ज्यामिरेको सडक खुलाउन बााकी छ, अझै दुई–तीन दिन लाग्छ ।’ २० गते उत्तरी क्षेत्रमा भीषण वर्षा भएको थियो ।