संसद्‌को गरिमा बचाउन उपसभामुखले राजीनामा दिनुपर्छ : सांसद गिरी

प्रतिनिधिसभा बैठकको विशेष समयमा मंगलबार बोल्दै सांसद गिरीले उपसभामुख रानाले संसद्‌ बाहिरका व्यक्तिहरुलाई अमेरिका लान आफ्नो लेटरप्याड प्रयोग गरी दूतावासमा पत्र लेख्नुले संसद्‌को गरिमामा आँच पुगेको बताए । उपसभामुखको कदमले सांसदहरुको शिर निहुराएको र लज्जित बनाएको उनको भनाइ छ ।

उनले उपसभामुखले पदीय मर्यादाअनुरुप काम गर्न नसकेको भन्दै पदबाट राजीनामा दिन आग्रह गरे ।

संसद्‌को मर्यादा कायम राख्नका लागि उपसभामुखको राजीनामा आउनुपर्ने उनको तर्क छ । ‘उपसभामुखले यो संसद्‌को गरिमालाई बचाउनका निम्ति पनि आफ्नो पदबाट राजीनामा दिएर मार्गप्रशस्त गर्दा यो संसदको गरिमा उँचो हुन्छ । सिंगो संसद्‌को मर्यादाको निम्ति उहाँले यो कदम चाल्नुपर्छ,’ उनले भने ।

अमेरिकाको न्युयोर्क सहरमा महिलाहरुको एउटा कार्यक्रममा जानको निम्ति वैदेशिक रोजगार व्यवसायीहरुको मिलेमतोमा संसद् बाहिरका ४/५ जना मान्छेहरुलाई आफ्नो लेटरप्याड प्रयोग गरेर दूतावासमा पत्र लेखेर उपसभामुख रानामगर दूतावास धाउने कुराले सिगो संसद्को गरिमामा आँच आएको उनको भनाइ थियो ।

उपसभामुख रानामगरको राजीनामा माग्नु कुनै प्रतिशोधको कुरा नभएको सांसद गिरीले दाबी गरे ।