सिमलताल दुर्घटनाबारे कार्यदलको निष्कर्ष : जथाभावी सडक खन्दा आएको लेदोले दुर्घटना

कार्यदलले दुर्घटनास्थलभन्दा माथि पहाडी क्षेत्रमा हालसालै ग्रामीण सडक (सिमलताल–बाङ्गेसाल–डुम्रे गाउँ) खनिएको, सो क्षेत्रमा कमजोर भूगोल तथा अत्यधिक क्रस स्लोप भएको तथा उचित इन्जिनियरिङ डिजाइनबिना सडक खनिएको प्रतिवेदनमा उल्लेख गरेको छ । सडक बनाउँदा अत्यधिक मात्रामा निस्केको माटो छेउमा त्यसै फालेको पनि प्रतिवेदनमा उल्लेख छ ।

सडकमा कुनै टेवा पर्खाल निर्माण नगर्दा अत्यधिक वर्षामा त्यहाँ पहिरो गएको, त्यही पहिरो नै डेब्रिज बहाबको स्रोत बनेको र सोही डेब्रिज बग्दै सिन्दुरे खोल्सा हुँदै तल झर्दा तल्लो भागमा पहिरो खसेको प्रतिवेदनमा उल्लेख छ । खोल्सामा केही वर्ष पहिला बनेका चेकड्याम तथा ग्याबिन बालले पहिरोको दबाब थाम्न नसकेको र बाढीसँगै ठूलो परिणाममा आएको लेदो, गेग्रान र डेब्रिजले सडक पार गर्दै गरेका दुइटा सवारीसाधनलाई धकेलेर त्रिशूली नदीमा खसालेको देखिने प्रतिवेदनमा भनिएको छ ।

‘भरतपुर–२९ अन्तर्गत सिमलताल बाङ्गेसाल डुम्रेगाउँ सडक खण्डको निर्माण गर्दा समग्र वातावरणीय पक्षमा ध्यान दिएको देखिँदैन,’ प्रतिवेदनमा भनिएको छ । त्यसैगरी पहिरो आएर सडक सफा गर्दा भरतपुरको डिभिजन सडक कार्यालयले पनि सडक माथि थुप्रिएको डेब्रिज बगेर सडकमै आउँछ भनेर ख्याल नगरेको प्रतिवेदनले औंलाएको छ । जोखिमअनुरूप कल्भर्ट र क्याचपिटहरू सफा नगरेको देखिएको छ ।

सडक सुरक्षासम्बन्धी एकीकृत सूचना प्रणाली विकास नभएका कारण सडकको अवस्थाबारे सवारी चालकले पूर्वानुमान गर्न नसकेको र सुरक्षाकर्मीले सवारी रोक्न आवश्यक नठानेको देखिने प्रतिवेदनमा उल्लेख छ । गत असार २८ मा शुक्रबार बिहानपख साढे तीन बजेतिर काठमाडौंबाट गौर आउँदै गरेको प्रदेश ०३–००१ ख २४९५ नम्बरको गणपति यातायातको बस र वीरगन्जबाट काठमाडौं जाँदै गरेको वाग्मती प्रदेश ०३–००६ ख १५१६ नम्बरको एञ्जल नामको बस नारायणगढदेखि करिब २३ किलोमिटर पूर्वोत्तर सिमलताल सिँदुरेगैरामा झरेको लेदोसहितको पहिरोमा बग्दै त्रिशूलीमा खसेर बेपत्ता भएका थिए ।

चितवन जिल्ला प्रशासन कार्यालयका अनुसार दुवै बसमा ६५ जना यात्रु थिए । एञ्जल बसका तीन यात्रुले पौडिएर ज्यान जोगाएका थिए । खोजी टोलीले घटनास्थलदेखि लगभग १ सय ३ किलोमिटर तल नारायणी नदी तट र त्रिवेणी बाँध क्षेत्रबाट २५ वटा शव फेला पारेको थियो । अध्ययन कार्यदलले सडक सुरक्षा, उद्धार टोलीको क्षमता वृद्धि, मृतक र बेपत्ताका परिवारलाई दिने राहतलगायत विषयमा पनि सिफारिस गरेको छ ।