डम्बरसिंह राई

खोटाङ र भोजपुरको सिमानामा रहेको पर्यटकीयस्थल चखेवामा नयाँ वर्षको अवसरमा महोत्सव आयोजना गरिने भएको छ । टेम्केमैयु गाउँपालिकाको सहयोगमा चखेवा बजार तथा सहरीकरण व्यवस्थापन समितिको आयोजनामा वैशाख १ देखि ३ गतेसम्म कृषि पर्यटन तथा सांस्कृतिक महोत्सव आयोजना गरिने भएको हो ।

जन्तेढुङ्गा गाउँपालिकाले बाँसबाट विभिन्न सामग्री बनाउने तालिम दिएको छ । गाउँपालिकाको चालु आर्थिक वर्ष एक लाख रूपैयाँको लागतमा उक्त तालिम दिइएको हो ।

दिक्तेल रुपाकोट मझुवागढी नगरपालिका–१५ विजयखर्कस्थित चम्पावती माविमा विद्यार्थी खाजाबापतको रकम अनियमितता गरेकामा नगरपालिकाले असुलउपर गरेको छ । दिवा खाजाबापतको रकम अनियमितता भएको बारे नगरपालिकाले अनुसन्धान सुरु गरेपछि ५० हजार रुपैयाँ फिर्ता भएको हो ।

पहिचानपक्षधरले आह्वान गरेको बन्दका कारण खोटाङमा शनिबार बिहानैदेखि यातायात ठप्प  भएको छ । एमाले अध्यक्ष केपी ओलीको ‘झुलाघाट–चिवाभन्ज्याङ समृद्धिका लागि संकल्प यात्रा’को क्रममा अवरोधका क्रममा पक्राउ परेकालाई निसर्त रिहाको माग गर्दै पहिचानपक्षधरले सडकमा प्रदर्शन गरेका हुन् ।

एमाले अध्यक्ष केपी शर्मा ओलीको ‘झुलाघाट–चिवाभन्ज्याङ समृद्धिका लागि संकल्प यात्रा’लाई अवरोध गर्न पहिचानपक्षधरहरूले आह्वान गरेको यातायात बन्द गराउने ५ जना पक्राउ परेका छन् । मध्यपहाडी लोकमार्गअन्तर्गत हलेसीमा ४ जना र नुनथलामा १ जनालाई मंगलबार प्रहरीले नियन्त्रणमा लिएको हो ।