उनी बितेपछि राजधानीमा बिनाचित्तबुझ्दो काम बिलकुल बस्न मन लागेन । विषयमिल्दो केही काम खोजेँ, पाएँ र केही दिन गरेँ पनि । आंशिक काम र दाममा रमाउन सकिनँ । घर सल्लाह गरें, तीन महिना पुरानै काममा फर्किने र एक्लै बस्न सकिन्छ/सकिँदैन कोसिस गर्ने, नसके राजधानी फर्कने कुरा भयो । मन दरो पारेर गृह सहर आएँ, काममा जोडिन चाहेको निवेदन दिएँ र जागिर खान थालेँ । जब घरदेखि जागिर भएको सहर फर्कें, म भित्ताहरूले घेरिएको भवनमा एक्लै बस्छु । सुरुसुरुमा राति झस्किन्थें, दिउसो एक्लै रुन्थें, डर पनि लाग्थ्यो किनकि पहिले घरमा कहिल्यै एक्लै बस्नुपरेको थिएन ।
