विनोद सिजापति

आवधिक निर्वाचन र शान्तिपूर्ण सत्ता हस्तान्तरणलाई आत्मसात् गर्ने हो भने लोकतन्त्रले जरा गाडेको अनुभूति हुन्छ । लोकतन्त्र स्थापनापश्चात्को ३३ वर्षे अवधिमा संविधानसभाको दुई पटकसहित ७ वटा आमनिर्वाचन भए । निर्वाचन प्रक्रियामा जनसहभागिता उत्साहजनक थिए । स्थापित निर्वाचन प्रणालीका घोर विरोधी राजनीतिक दलहरूसमेत निर्वाचनमा सामेल भए । अर्कातर्फ उक्त अवधिमा ३० पटक सरकार परिवर्तन भयो । 

नेपाल भन्नासाथ विश्वले सम्झनेमध्ये प्रमुख पक्ष हो— हिमाली शृंखलाको काखमा रहेको र दुई उदीयमान शक्तिराष्ट्र भारत तथा चीनबीच रहेको भूपरिवेष्टित राष्ट्र । विश्वको सर्वोच्च शिखर सगरमाथासहित अन्य ८ उच्च हिमशिखरहरू भएको, प्राकृतिक सुन्दरता तथा सांस्कृतिक सम्पदाले भरिपूर्ण देश । साम्राज्यवादी शक्तिसँग भिडेर स्वतन्त्र अस्तित्व कायम गर्न सकेको ऐतिहासिक वास्तविकता ।