रञ्‍जु दर्शना

नेपालको पहिलो आम निर्वाचनदेखि नै दलगत, समूहगत तथा व्यक्तिगत रूपमा स्वतन्त्र उम्मेदवारी भएको इतिहास छ । २०७९ सालको निर्वाचनमा पनि दलीय र गैरदलीय रूपमा म लगायतका उम्मेदवारहरू सहभागी रह्यौं । उक्त निर्वाचनमा म विजयी हुन सकिनँ । हार्नु र जित्नु एउटा ठाउँमा हुन्छ, कहिलेकाहीँ सहभागी हुनुले पनि अर्थ राख्छ ।

चप्पल–कारखाना अफिसबाट घर फर्कंने बेला उज्वल दाइलाई जोड लगाएर भनेँ, ‘दाइ सुन्नु न ! कान्तिपुर टीभीमा एउटा प्रोग्राम आउँछ नि, त्यसमा सधैं अरू पार्टीका ठूला नेतालाई मात्रै बोलाउँछन्, कुनै दिन विवेकशीलबाट तपाईं र गोविन्द दाइलाई पनि बोलायो भने कस्तो राम्रो हुन्थ्यो के !,’ एक्साइटमेन्टमा थिएँ सायद । एउटै प्रश्नभित्र दाइले उत्तर पनि दिनुभयो, ‘रञ्जु, त्यो प्रोग्राममा तिमी किन हुन सक्दैनौ ?’