साउन ३ गते कान्तिपुर टेलिभिजनमा पत्रकार दिलभूषण पाठकसँग कानुनमन्त्री धनराज गुरुङको अन्तर्वार्ता हेरेपछि म यी हरफहरू लेख्न बाध्य छु । कानुनमन्त्रीले विवेक बन्धकी राख्नुभयो । सार्वजनिक रूपमा उहाँले अभियुक्तको प्रवक्ताको शैलीमा अभियुक्तले नै निर्माण गरेको भाष्य बोल्नुभयो । हिंसाको वकालत गर्नुभयो । संगठनको आडमा गरिएको अपराधको खुलेआम ढाकछोप र बचाउ गर्नुभयो ।
गणतान्त्रिक नेपालको न्याय प्रणालीसँगको मेरो अनुभव दुःखद र विरोधाभासपूर्ण रहिआएको छ । म पहिले र अहिले पनि प्रत्येक क्षण भय र त्रासमा बिताइरहेको छु । तैपनि केही झीनो आशाका साथ न्यायका निम्ति म लागिरहेकै छु । देशको न्यायालयप्रतिको भरोसा टुटाइहाल्न पनि त सक्दिनँ !
