अञ्जन श्रेष्ठ

कुनै पनि देशको अर्थतन्त्र धान्ने निजी क्षेत्रले हो । नेपालमा पनि अर्थतन्त्रको ठूलो हिस्सा निजी क्षेत्र नै हो । नेपालको अर्थतन्त्रमा निजी क्षेत्रको योगदान ८१ प्रतिशतभन्दा बढी छ । सबैभन्दा धेरै रोजगारी निजी क्षेत्रले नै प्रदान गरेको छ । 

कोभिड महामारीयताको समय नेपालका लागि मात्र नभएर विश्व अर्थतन्त्रलाई नै कठिन बन्दै गएको छ । पछिल्लो एक वर्ष ज्यादै असहज देखियो । युरोप र अमेरिकामा बढ्दै गएको मुद्रास्फीति, रोजगारीमा आएको कटौती, निर्यातमा आएको कमीले गर्दा चीनको व्यापार घटेर देखिएको संकुचन आदिले गर्दा पछिल्ला ३ वर्ष विश्वभरकै निजी क्षेत्रका लागि अप्ठ्यारो गरी बिते । यद्यपि पर्याप्त लगानी, भौतिक पूर्वाधार र उचित नीतिगत निर्णयका साथै सरकारहरूले निजी क्षेत्रलाई गरेको विश्वासका कारण विश्वका धेरै अर्थतन्त्र बिस्तारै तंग्रिँदै छन् ।