२०८० मंसिर र पुसमा मात्र झापा र मोरङ जिल्लामा हात्तीको आक्रमणमा परी छ जनाको ज्यान गयो । जलथल जंगलवरिपरि एक वर्षयता हात्तीको आक्रमणमा परी तीन जनाको मृत्यु भयो भने सोही क्षेत्रमै हात्ती पनि तीनवटै मरे वा मारिए । एक जना हात्ती आक्रमणबाट गम्भीर घाइते भए । घर, गोठ र बालीनाली क्षतिको फेहरिस्त निकै लामो छ ।
नेपालको कुल जंगलमध्ये ०.१ प्रतिशत क्षेत्र ओगटेको झापास्थित जलथल जंगलमा अहिलेसम्म रूखका १५० प्रजाति फेला परेका छन् । यो संख्या नेपालमा पाइने रूख प्रजातिको एकचौथाइ हो ।
