विवश वस्ती

२००७ साल फागुन ७ गतेपश्चात् करिब एक दशकअघिदेखि राणाशासनविरुद्ध उर्लिएको जनक्रान्तिको भेल मत्थर हुन पुग्यो र राजनीतिक घटनाक्रम अर्कै दिशातिर मोडियो । ऐतिहासिक जनक्रान्तिपछिका वर्षहरू पूरै संक्रमणकालीन अवस्थाबीच गुज्रिए र अनेक राजनीतिक घटना–परिघटनाहरूका चाङ लागे ।

पूरै चाउरी परेको हातले आफूजस्तै वृद्धवययुक्त लौरो टेक्दै आईसीयूभित्र छिर्ने बेला बाको अनुहार पूरै हँसिलो–रसिलो देखिन्थ्यो । केही क्षणको आईसीयूको बसाइपछि बाहिर निस्किँदा भने आँसुले डब्डबाएका अनुहारबीच नियाल्यौं, हामीले । उहाँको अनुहार न हँसिलो, न त थियो रसिलो नै ।