अन्तर्राष्ट्र्रिय जलस्रोत कानुनले साझा नदीको विकास गर्दा आपसी सद्भाव र विश्वास महत्त्वपूर्ण हुने कुरा स्विकारेको छ । असल छिमेक भावनाले प्रेरित हुँदै बढेको आपसी सद्भावका कारण संसारका धेरै अन्तर्राष्ट्रिय नदीहरूको संयुक्त विकास सम्भव भएको छ । यी कुराहरू प्रथाजनित अन्तर्राष्ट्रिय कानुनको विकासमा कारकका रूपमा पनि रहेका छन् ।
नेपालमा जलस्रोतको प्रचुर सम्भावना हुँदा पनि यसको उच्चतम उपयोग हुन सकेको छैन । विविध प्रकृतिका जलस्रोतको उपयोग गर्ने हो भने नेपालमा आर्थिक विकासको पर्याप्त सम्भावना देखिन्छ । मुलुकमा सिँचाइको विस्तारबाट खाद्यान्न उत्पादनमा वृद्धि ल्याई बढ्दो जनसंख्याको आवश्यकता परिपूर्तिमा सहयोग पुर्याउने, जलविद्युत् ऊर्जाको अधिकतम उत्पादन गरी देशको आन्तरिक माग पूरा गरी छिमेकी राष्ट्रमा निर्यात गर्न सकिने सम्भावनाहरू पनि प्रशस्त छन् ।