संवैधानिक व्यवस्थाका कारण अबको एक सातामै आगामी आर्थिक वर्षको बजेट संघीय संसद्मा पेस हुनेछ । जेठ १५ गते गणतन्त्र दिवसकै दिन बजेट ल्याउनैपर्ने संवैधानिक प्रावधानका कारण बजेट निर्धारित मितिमा आउनेछ । नीति तथा कार्यक्रम आइसकेको र त्यसकै मूलभूत मान्यताका आधारमा बजेट आउने भएकाले धेरैको प्रतीक्षा र पर्खाइको विषय बनेको छ । बजेट त हरेक वर्ष आउँछ, चाहे सदनबाट होस् वा अध्यादेशबाट । बजेट भाषण सुन्न सिंगो मुलुक लालायित हुन्छ तर अहिलेसम्म बजेटबाट आमनागरिकले के पाए, कसले कति पायो ? त्यो फेरि समीक्षाको विषय हो ।
