डा. धर्मकान्त बास्कोटा

नेपालको हरेक क्षेत्रमा उच्च शिक्षाको ज्योति फैलाउन सफल, उच्च शिक्षाको धरोहर त्रिभुवन विश्वविद्यालयको प्रमुख कार्यकारी पद ‘उपकुलपति’ निमित्तका भरमा चलेको तीन महिना भएको छ । अन्य कार्यकारी पद शिक्षाध्यक्ष र रजिस्ट्रार पनि निमित्तकै भरमा चलिआएका छन् । यी सबै कार्यकारी पदहरू त्रिविमा उच्च शिक्षा अध्ययनरत झन्डै ५ लाख विद्यार्थीको भविष्यसँग जोडिएको हुँदा नै होला, त्रिविको तत्कालीन ऐन–नियममा निमित्त उपकुलपतिको व्यवस्था नै राखिएको थिएन ।

नेपालका विश्वविद्यालयहरू अहिले पनि आकर्षणका थलो छन् भन्ने मलाई लाग्छ । आकर्षण बढ्दै जानुपर्ने हो तर घट्दै गएको चाहिँ साँचो हो । घट्नुको कारण म स्पष्ट पार्छु । राजनीतिक परिवर्तन हासिल गर्न दलहरूले विश्वविद्यालयका शिक्षक, कर्मचारी र विद्यार्थीको प्रयोग गरे, त्यसैले सबैथोक बिगार्‍यो ।