अमेरिकी न्यायमूर्ति जेम्स कारले भनेका छन्, ‘हामीलाई हाम्रा संस्थापकहरूले शासन गर्ने एउटा स्थिर प्लेटफर्म दिएका थिए । उनीहरूले हामीलाई तीनखुट्टे कुर्सी दिए, जसले कार्यपालिका, व्यवस्थापिका र न्यायपालिकालाई प्रतिनिधित्व गर्छ । यदि हामीले त्यसको एउटा खुट्टा काट्यौं वा कमजोर बनायौं भने, हाम्रो शासन प्रणालीको पतन हुनेछ ।’ कतै हामी त्यसै दिशातर्फ त गइरहेका छैनौं ?
वास्तवमा सर्वोच्च अदालत नै एउटा संवैधानिक अदालत हो, जुन मुख्य रूपमा संवैधानिक कानुनसँग सम्बन्धित छ । उदाहरणका लागि, संयुक्त राज्य अमेरिकाको सर्वोच्च अदालतलाई संसारको सबभन्दा पुरानो संवैधानिक अदालत भनिएको छ किनकि यो संविधानसँग बाझिएका कानुनलाई असंवैधानिक घोषणा गरी अमान्य तुल्याउने संसारकै सुप्रसिद्ध प्रारम्भिक अदालतहरूमध्ये एउटा थियो ।
एउटा फरक प्रसंगमा लेखक शंकर तिवारीले असार १४ को कान्तिपुर दैनिकको विचार स्तम्भमा अमेरिकी स्वतन्त्रता संग्रामको घोषणापत्रका लेखक पूर्वराष्ट्रपति थोमस जेफर्सनको महत्त्वपूर्ण विचार उद्धृत गर्नुभएको छ ।
