नाउपाका गंगाराम चौधरी लगायत तीन सांसद उपसभामुखविरुद्धको महाअभियोग प्रस्तावको विपक्षमा उभिने तयारीमा छन्।
धनगढी — उपसभामुखलाई हटाउने कांग्रेस एमालेको कसरतमा नागरिक उन्मुक्ति पार्टी (नाउपा) मा दुई धार देखिएको छ । विपक्षी बेन्चमा बस्दै आएकी पार्टी अध्यक्षसमेत रहेकी सांसद रञ्जिता श्रेष्ठ चौधरी सत्तारुढ दलको बैठकमा सहभागी भएकी छिन् ।
पार्टीका अन्य तीन जना सांसद भने उक्त प्रस्तावको विपक्षमा उभिने भएका छन् । नाउपा अध्यक्ष रञ्जिता श्रेष्ठले उपसभामुख इन्दिरा राना मगरलाई महाअभियोग लगाउने विषयमा निर्णय नभइसकेको बताएकी छन्।
उनले संसदीय दलको बैठकमा यसबारे निर्णय लिइने बताइन् । नाउपाका चार सांसद छन् । सांसदहरू गंगाराम चौधरी, अरुण चौधरी र लालबीर चौधरीले विपक्षमा उभिने तयारी गरेको नागरिक उन्मुक्तिका नेता ठाकुरसिंह थारुले बताए ।
'रञ्जिताजी के गर्नु हुन्छ था छैन, तीन जना सांसद भने विपक्षमा उभिने कुरा छ,' उनले भने । नाउपामा गंगाराम चौधरी संसदीय दलको नेता छन् । तर अध्यक्ष श्रेष्ठले गत साता उनलाई दल नेताबाट हटाइएको पत्र दिएकी छिन् । यसअघि नाउपाले सरकारबाट समर्थन फिर्ता लिएर विपक्षी बेन्चमा गएको छ ।
