दुवै दलका नेता भन्छन् : आपतविपद्मा प्रयोग हुन्छ । दलले हस्ताक्षर दुरुपयोग गर्दैन । यो ०४८ सालदेखि नै चलेको चलन हो ।
What you should know
काठमाडौँ — कांग्रेस र एमालेका शीर्ष नेताबीच उपसभामुख इन्दिरा रानालाई पदअनुकूल आचरण नगरेको प्रस्ताव दर्ता गरेर हटाउने सहमति भए पनि दुवै दलका सांसदहरू भने खालि कागजमा हस्ताक्षर गरेका छन् । सांसदहरूले आफूलाई के विषयमा हस्ताक्षर गराइएको हो समेत भन्ने कुरा थाहा नभएको बताइरहेका छन् ।
मंगलबार सिंहदरबारमा दुवै दलले आफ्ना सांसदहरुलाई खाली पानामा हस्ताक्षर गराएका हुन् । सबैतिर उपसभामुख हटाउनका लागि प्रस्ताव दर्ताको चर्चा भए पनि सांसदहरू भने अनभिज्ञ देखिएका छन् ।
कांग्रेस प्रमुख सचेतक श्यामकुमार घिमिरेले संसदीय दलले हस्ताक्षर गराउनसक्ने र कुनै पनि बेला काम लागेको समयमा प्रयोग गर्नसक्ने बताए । उनले उपसभामुखले पदीय आचरण पूरा नगरेको हुनाले उनलाई हटाउन प्रस्ताव पेस हुँदैछ भन्नेकुरा सञ्चारमाध्यममा आए पनि सही नभएको दाबी गरे । 
‘संसदीय दलले केही काम कुनै पनि बेला पर्नसक्छ, कुनै पनि काम गर्नुपर्ने हुनसक्छ । उपसभामुखले पदीय आचरण पूरा नगरेको हुनाले उहाँमाथि हटाउन प्रस्ताव पेस हुँदैछ भन्नेकुरा सञ्चारमाध्यममा आएको छ । त्यो सही होइन । अहिले केही विधेयकहरु अड्किएर बसेका छन् । त्यसलाई टुंग्याउने बारेमा छलफल हुन्छ,’ उनले भने ।
एमाले मुख्य सचेतक महेश बर्तौलाले पनि उपसभामुखले पदीय मर्यादाविपरीत केही मानिसहरूलाई अमेरिकाका लागि असम्बन्धित कार्यक्रममा लैजान पत्राचार गरेको कुरा संसद्मा उठे पनि अहिले सांसदहरूको हस्ताक्षर त्यस प्रयोजनका लागि नभएको बताए । उनले सत्तारुढ दल उपसभामुखमाथि महाअभियोग लगाउने निर्णयमा पुगिनसकेको बताए । यद्यपि उनीमाथिको आरोप राफसाफ गर्नुपर्ने उनले बताए ।
उनले भने, ‘उपसभामुखले पदीय मर्यादाविपरीत असबन्धित रूपमा पत्राचार गरेर केही मानिसहरुलाई अमेरिकाका लागि असम्बन्धित कार्यक्रममा लैजान पत्राचार गर्नुभयो । हामी उहाँमाथि महाभियोग प्रस्ताव दर्ता गर्नुपर्छ भन्नेबारेमा निर्णयमा पुगिसकेका छैनौँ । आज भोलि नै उहाँका बारेमा कुनै प्रस्ताव दर्ता गर्ने मनशायमा सत्तारुढ दलहरू छैनन् । संसद्मा उहाँको विषय उठेको सत्य हो । त्यो विषयले पनि किनारा पाउनुपर्छ । उहाँमाथि पनि आरोप लागेपछि न्याय पाउनुपर्छ । यो संसद्ले गर्ने काम हो । सरकारको कुरा होइन ।’
एमाले सचिव योगेश भट्टराईले आपत आइलाग्दा प्रयोग गर्न सांसदहरूको हस्ताक्षर संकलन गरिएको बताएका छन् । कांग्रेस र एमालेले सल्लाह गरेर हस्ताक्षर नगरेको भन्दै एकैदिन पर्नु संयोगमात्रै भएको उनको भनाइ छ । महाअभियोग लगाउन, सरकार बदल्न हस्ताक्षरको काम लाग्ने उनले दाबी गरे ।
‘पार्टीको संसदीय दलमा बेलाबेला माननीयज्युहरुको हस्ताक्षर लिइराख्छौँ । आपतविपद्मा प्रयोग हुन्छ । दलले हस्ताक्षर दुरुपयोग गर्दैन । यो ०४८ सालदेखि नै चलेको चलन हो । आफ्ना दलले आफ्ना माननीयहरुको हस्ताक्षर लिइरहेको हुन्छ । कांग्रेस र हाम्रो सल्लाहले हस्ताक्षर गरेको होइन, एकैदिन पर्यो होला, संयोग हो । हस्ताक्षरहरू विभिन्न काममा प्रयोग हुन्छन् । महाअभियोग, सरकार बदल्न प्रयोग हुन्छन्,’ उनले भने ।
