असल शासन अभियानमार्फत कोशी प्रदेशमा सुशासनको सवालमा समेत काम गरेका गेलालले केही समय पत्रकारिता समेत गरेका थिए । उनले रेडियो स्रोता क्लबबाट भ्रष्टाचारविरुद्धको अभियान संचालन गरेका थिए । संविधानसभा निर्वाचनको समयदेखि संविधानसम्बन्धी अभियन्ता तथा सार्वजनिक सुनुवाइहरूमा समेत काम गरेका उनी व्यावसायिक रूपमा विद्युतीय सवारी साधन र अटोमोबाइल क्षेक्रको विस्तारमा सत्रिय थिए ।

मिलनसार, सरल स्वभाव र वाककलामा निपुण रहेका गेलाल शिक्षा, संगठन र व्यावसायिक नेतृत्वमा समेत अब्बल मानिन्छन् । प्रतिनिधिसभा सदस्य निर्वाचित भएपछि गेलालले उदयपुरको समग्र आर्थिक विकास, युवालाई रोजगारी सिर्जना, स्थानीय उद्योग विस्तार तथा कृषिमा आधुनिकीकरण गर्ने प्रतिबद्धता व्यक्त गरेका छन् । निर्वाचित भएर प्रमाणपत्र बुझ्दै उनले भने, ‘उदयपुर कृषि, पर्यटन र साना–मझौला उद्योगको सम्भावना बोकेको जिल्ला हो, योजनाबद्ध रूपमा अघि बढाउदै स्थानीय अर्थतन्त्र बलियो बनाउने मेरो प्रमुख लक्ष्य हो ।’

सुशासन र पारदर्शितालाई प्राथमिकता दिने, जनतासाग प्रत्यक्ष संवाद गर्दै भ्रष्टाचार नियन्त्रण र सरकारी सेवालाई चुस्त, दुरुस्त र पारदर्शी बनाउने विषयलाई संसदमा जोडदार रुपमा उठाउने उनको प्रतिबद्धता व्यक्त गरेका छन् । पुराना राजनैतिक शक्तिहरुबाट देशमा विकास, सुशासन, भ्रष्टचार नियन्त्रण र देशमै रोजगारीको अवसर सिर्जना हुन नसक्ने भन्दै रास्वपाको राजनीतिमा होमिएका गेलालले पहिलो पटकमै संसदको यात्रा तय गरेका छन् ।