उदयपुर — उदयपुरको कटारी नगरपालिका–७ मर्जेतपुरका पर्यटन व्यवसायी ४१ वर्षीय सूर्यबहादुर तामाङको परिचय बदलिएको छ । प्रतिनिधिसभा सदस्य निर्वाचनमा राष्ट्रिय स्वतन्त्र पार्टीबाट उदयपुर-२ मा निर्वाचित भएपछि तामाङ सांसदको रुपमा चिनिने भएका हुन् । उनले एमालेका अम्बरबहादुर रायमाझीलाई दोब्बर मतले पराजित गर्दै संसद्‌को यात्रा तय गरेका हुन् । निर्वाचित तामाङले १४ हजार ८०२ मत ल्याएका थिए भने प्रतिस्पर्धी रायमाझीले ७ हजार ६४८ मत मात्र प्राप्त गरे ।

रास्वपा उदयपुरका सचिव रहेका तामाङ पुराना दलबाट विकास सम्भव नभएको भन्दै चुनावी मैदानमा होमिएका थिए । २०४१ सालमा कटारीको मर्जेतपुरमा जन्मिएका उनले कक्षा ५ सम्म सरस्वती आवि मर्जेतपुर र मावि मरुवामा कक्षा ८ सम्म र त्रिवेणी माविबाट एसएलसी उत्तीर्ण गरेका थिए । उच्च शिक्षा भने उनले काठमाडौंको रत्नराज्य लक्ष्मी क्याम्पसबाट गरे । 

कटारीको गढीकोट पर्यटन विकासका अभियन्ता तामाङ २०७९ सालदेखि रास्वापाको राजनीति सक्रिय छन् । देशमा भ्रष्टाचार, बेथितिले सीमा नाघेपछि नयाँ पुस्ता राजनीतिमा आउने क्रममा आफू पनि सक्रिय भएको उनी बताउँछन् । युवा माझ लोकप्रिय तामाङ कटारीस्थित सौर्य सिमेन्टको चुनढुंगा खानीले फैलाएको प्रदूषण, खानीको कम्पनले स्थानीयलाई परेको असरका विरुद्ध चरणबद्ध आन्दोलनको नेतृत्व गरेर चर्चामा आएका थिए ।