काठमाडौँ — विज्ञापन बोर्डले प्रतिनिधिसभा सदस्य निर्वाचनको सन्दर्भमा निर्वाचन प्रचार-प्रसारसम्बन्धी प्रावधान कडाइका साथ पालना गर्न आग्रह गरेको छ । 

बोर्डले सोमबार सूचना जारी गर्दै निर्वाचन आचारसंहिता, २०८२ को परिच्छेद ४ दफा १७ अनुसार तोकिएको समयसीमाभित्र मात्र प्रचार–प्रसार गर्न पाइने स्पष्ट पारेको हो । सूचना अनुसार फागुन १८ गते राति १२ बजेदेखि प्रचार–प्रसार गर्न नपाइने व्यवस्था छ । 

मतदान हुने दिनभन्दा अघिल्लो ४८ घण्टादेखि मतदान केन्द्र बन्द नहुँदासम्म राजनीतिक दल, उम्मेदवार वा सम्बन्धित व्यक्तिले कुनै पनि प्रकारका सभा, अन्तरक्रिया, गोष्ठी, कार्यशाला जस्ता कार्यक्रम सञ्चालन गर्न नपाइने उल्लेख गरिएको छ । यस अवधिमा सामाजिक सञ्जाल, अनलाइन, छापा तथा अन्य माध्यमबाट दल वा उम्मेदवारको पक्ष-विपक्षमा कुनै सन्देश, सूचना वा प्रचार सामग्री पोस्ट, सेयर, प्रतिक्रिया वा प्रसारण गर्नसमेत निषेध गरिएको बोर्डले जनाएको छ । 

मतदान हुने दिन मतदान स्थलको तीन सय मिटर वरिपरि राखिएका दल वा उम्मेदवारका प्रचार सामग्री हटाउनुपर्ने व्यवस्था पनि स्मरण गराइएको छ । त्यस्तै, निर्वाचन आयोग नेपाल र विज्ञापन बोर्डले स्वीकृत गरेका बाहेक अन्य विज्ञापनहरू फागुन १८ गते राति १२ बजेदेखि हटाउनुपर्ने सूचनामा उल्लेख छ ।