काठमाडौँ — मंगलबार बिहानै तिब्बतबाट आएको बाढी भोटेकोशी नदीमा मिसिएपछि सुरु भएको विपत्तिले तहसनहस मच्चाएको खबर सार्वजनिक भयो । बाढीले नेपाल-चीन जोड्ने मितेरी पुल बगायो । सुक्खा बन्दरगाहमा रहेका नयाँ विद्युतीय गाडी (ईभी) हरूमा पनि ठूलो क्षति पुग्यो ।

भोटेकोशीमा आएको बाढीबाट १८ जना सम्पर्कविहीन भएका सरकारी अधिकारीहरुले बताएका छन् । रसुवाका सहायक प्रमुख जिल्ला अधिकारी द्रुवप्रसाद अधिकारीका अनुसार सम्पर्कविहीन हुनेहरूमा ३ जना प्रहरी ९ जना नेपाली र ६ चिनियाँ नागरिक छन् । त्यस्तै टिमुरेस्थित ईभी चार्जिङ स्टेसनमा क्षति पुगेको छ भने रसुवागढी जलविद्युत् आयोजनाको ड्याममा पनि क्षति पुगेको छ । 

भोटेकोशीमा आएको बाढीले नुवाकोटको विदुर नगरपालिका वडा नम्बर–१ र ९ बीचमा बाढीमा दुई जना फसेका थिए । तिनीहरुको नेपाली सेनाको हेलिकोप्टरबाट उद्धार भइसकेको छ । 

बाढी पूर्वानुमान महाशाखाले तिब्बतबाट आएको बाढीको प्रभाव त्रिशूली नदी र बुढीगण्डकी दोभानसम्म देखिन बताएको छ । महाशाखाले भनेको छ, 'यस विभागको भोटेकोशीस्थित रसुवा-स्याप्रुबेंसी जलमापन केन्द्रमा आज बिहान ३:३० बजे बाढी पुगेको देखिन्छ ।' महाशाखाका अनुसार उक्त बाढी बिहान ५ बजेतिर बेत्रावती आइपुगेको थियो ।