काठमाडौँ — दोलखाको गौरीशंकर गाउँपालिका उपाध्यक्षका लागि भएको उपनिर्वाचनको मतगणना सोमबार दिउँसोदेखि सुरु भएको छ । वडा नम्बर १र २ मतगणना हुँदा नेकपा माओवादी केन्द्रले सुरुवाती अग्रता लिएको हो ।
माओवादी उम्मेदवार निमलेकी शेर्पाले ८०९ मतसहित अग्रता बनाएकी छिन् । उनकी निकटतम् प्रतिद्वन्द्वी नेकपा एमालेकी उमा लुंगेली मगर शेर्पाले ४४७ मत पाएकी छिन् ।
यस्तै नेपाली कांग्रेसकी पासदिकी शेर्पाले २४० मत ल्याएकी छिन् । रास्वपाकी गोमा श्रेष्ठले १८ र एकीकृत समाजवादीकी रविना खड्काले १४ मत ल्याएकी छिन् ।
उपाध्यक्ष पदका लागि आइतबार भएको उपनिर्वाचनमा ४८ दशमलव २८ प्रतिशत(७ हजार ५ सय ८९ मत) खसेको थियो ।
यसअघि ०७९ को चुनावमा गौरीशंकरको उपाध्यक्षमा कांग्रेसका श्यामसुन्दर तामाङ ४ हजार ७ सय ४१ मत प्राप्त गर्दै विजयी भएका थिए । उनका निकटतम् प्रतिस्पर्धी एमालेकी मुना शिवाकोटी केसीले ३ हजार २ सय ८१ मत ल्याएकी थिइन् । ०७९ को चुनावमा यहाँ कांग्रेस र माओवादीको गठबन्धन भएको थियो । अध्यक्षमा माओवादीका विश्वास कार्की विजयी भएका थिए ।
