संसदीय समितिको निर्देशन, 'आरडीटी परीक्षण प्रभावकारी भएन, पीसीआर विधिलाई व्यापक बनाउनू' - समाचार - कान्तिपुर समाचार
कान्तिपुर वेबसाईट
AdvertisementAdvertisement

संसदीय समितिको निर्देशन, 'आरडीटी परीक्षण प्रभावकारी भएन, पीसीआर विधिलाई व्यापक बनाउनू' 

जयसिंह महरा

काठमाडौँ — कोरोना भाइरसविरुद्ध आरडीटी परीक्षण प्रभावकारी नभएको भन्दै संसदीय समितिले पीसीआर विधिबाट गरिने परीक्षणमा वृद्धि गर्न सरकारलाई निर्देशन दिएको छ । 

प्रतिनिधिसभा अन्तर्गतको अन्तर्राष्ट्रिय सम्बन्ध समितिको शनिबार बसेको बैठकले आरडीटी विधिबाट हुने परीक्षणलाई न्यूनिकरण गर्दै पीसीआर विधिबाट गरिने परीक्षणमा वृद्धि गर्न निर्देशन दिएको हो । संसदीय समितिको निर्देशनमा भनिएको छ, 'कोभिड-१९ को परीक्षणका लागि आरडीटी विधि प्रभावकारी नदेखिएकाले गर्दा तत्काल सो विधिलाई न्यूनिकरण गर्दै पीसीआर विधिलाई व्यापक बनाउने ।'

आरडीटी परीक्षणबारे सांसदहरूले प्रश्न उठाएका थिए । यसअघि स्वास्थ्य क्षेत्रका जानकारहरूले पनि आरडीटी विधिबाट हुने परीक्षणमा प्रश्न उठाउँदै आएका छन् ।

स्वास्थ्य तथा जनसंख्या मन्त्रालयका अनुसार शनिबारसम्म १ लाख ७ हजार ५५ जनाको आरडीटी विधिबाट कोरोना परीक्षण गरिएको छ भने ६६ हजार ७ सय २९ जनाको पीसीआर विधिबाट कोरोना परीक्षण गरिएको छ । जसमा एक हजार ४ सय १ जनामा कोरोना संक्रमण भेटिएको छ ।

आरडीटी परीक्षणमा कोरोना भाइरसको संक्रमण नेगेटिभ रिपोर्ट आएका व्यक्तिहरूमा पीसीआर विधिबाट परीक्षण गर्दा कोरोना संक्रमण पोजिटिभ भेटिएका उदाहरण प्रस्तुत गर्दै सांसदहरूले उक्त विधिबाट हुने परीक्षण रोक्नुपर्ने धारणा राखेका थिए । अन्तर्राष्ट्रिय सम्बन्ध समितिले स्वास्थ्य तथा जनसंख्या मन्त्रालयलाई आरडीटी परीक्षण न्यून गरेर पीसीर परीक्षणलाई व्यापक बनाउन भनेको हो ।

त्यस्तै, भारतसँग सीमा जोडिएका जिल्ला सदरमुकाम र स्थानीय तहका क्वारेन्टाइनलाई व्यवस्थित बनाउन पनि समितिले निर्देशन दिएको छ । 'नेपाल-भारत सीमाका सबै जिल्ला सदरमुकाम तथा स्थानीय तहमा रहेका क्वारेन्टाइनहरूलाई अझै व्यवस्थित गर्न र पीसीआर परीक्षणको संख्या बढाउनका लागि तत्काल आर्थिक प्याकेज घोषणा गर्नू,' समितिले सरकारलाई दिएको निर्देशनमा भनिएको छ ।

पछिल्लो समय भारतबाट स्वदेश आएका व्यक्तिहरूमा कोरोनाको संक्रमण व्यापक रूपमा देखिएको भन्दै सांसदहरूले समयमै सतर्कता अपनाउनुपर्ने बताएका थिए । कोरोनाका कारण स्थिति भयावह हुनु पहिला नै सरकारले त्यसविरुद्ध कदम चाल्नुपर्ने उनीहरूको भनाइ थियो ।

सम्बन्धित समाचारः

प्रकाशित : जेष्ठ १७, २०७७ १९:१४
प्रतिक्रिया
पठाउनुहोस्

दुल्लु क्‍वारेन्टाइनमा मृत्यु भएका व्यक्तिको रिपोर्ट पोजिटिभ, कोरोनाबाट मृत्यु हुनेको संख्या ७ पुग्यो 

ज्योति कटुवाल

दैलेख — दुल्लु नगरपालिकास्थित नेपाल विद्युत प्राधिकरणको क्वारेन्टाइनमा शनिबार मृत्यु भएका ३५ वर्षीय पुरुषमा कोरोना पुष्टि भएको छ । शनिबार स्वाबको रिपोर्ट पोजिटिभ आएको कर्णाली प्रदेशका सामाजिक विकासमन्त्री दल रावलले बताए ।

‘रिपोर्ट पोजिटिभ आउनेबित्तिकै हामीले शव व्यवस्थापनको लागि प्रक्रिया सुरु गरिसकेका छौं,’ उनले भने, ‘यसको लागि दैलेख जिल्ला प्रशासन कार्यालय र नगरपालिकासँग नियमित सम्पर्क भइरहेको छ ।’ ती व्यक्तिमा कोरोना पुष्टिसँगै नेपालमा कोरोनाबाट मृत्यु हुनेको संख्या ७ पुगेको छ ।


कोरोना संक्रमितको शब दुल्लुस्थित क्वारेन्टाइनमै छ । स्थानीय प्रशासन र सुरक्षाकर्मीको सहयोगमा आइतबारमात्र शव व्यवस्थापन गरिने प्रदेश सरकारले जनाएको छ । दैलेख सदरमुकामबाट नेपाली सेनाको टोली शब व्यवस्थापनको लागि दुल्लुतर्फ हिँडिसकेको जानकारी आफूले पाएको मन्त्री रावलले बताए । ‘सरकार शव व्यवस्थापनको लागि निश्चित विधि र मापदण्ड बनाएको छ,’ उनले भने, ‘सोहीअनुसार भोलि (आइतबार) व्यवस्थापनको काम हुन्छ ।’

१० दिनअघि भारतको गुजरातबाट आएका उनी शनिबार बिहान एक्कासी बेहोस भएका थिए । उनी ढलेको ४ घण्टापछि मात्र स्वास्थ्यकर्मीको टोली क्वारेन्टाइनमा पुगेको थियो । त्यतिबेलासम्म उनको मृत्यु भइसकेको थियो । बिहीबार ती व्यक्तिको स्वाबको नमुना निकालेर परीक्षणको लागि कर्णाली स्वास्थ्य विज्ञान प्रतिष्ठान जुम्लामा पठाइएको थियो ।

रिपोर्ट पोजिटिभ आएसँगै उक्त क्वारेन्टाइनमा बसेका अन्य व्यक्तिहरु भने त्रसित भएका छन् । दुल्लुस्थित नेपाल विद्युत् प्राधिकरणको क्वारेन्टाइनमा अहिले ७९ जना बसिरहेका छन् । नगर प्रमुख घनश्याम भण्डारीका अनुसार मृतक व्यक्तिसँग अन्य तीनजना व्यक्ति एउटै ओछ्यानमा सुत्ने गर्थे । ‘रिपोर्ट पोजिटिभ देखिएपछि ती व्यक्तिको कारण पनि त्रास छाएको छ,’ उनले भने, ‘तैपनि हामीले भित्रको माहोल सामान्य बनाउने प्रयास गरिरहेका छौं ।’

दुल्लु अस्पतालकी डा. पूजा बिसीले कोरोना संक्रमण देखिए पनि तत्कालीक अवस्थामा उनमा हृदयघातको लक्षण देखिएको बताइन् । आइसोलेसनमा लगेर उपचार गर्ने तयारी गर्दागर्दै उनको मृत्यु भएको उनको भनाइ छ ।

प्रकाशित : जेष्ठ १७, २०७७ १९:११
पूरा पढ्नुहोस्
प्रतिक्रिया
पठाउनुहोस्
×