ओम्‍नीले नेपालमा भित्र्याएकै ब्रान्डको आरडीटी किट प्रयोगमा भारतमा लाग्यो रोक- समाचार - कान्तिपुर समाचार
कान्तिपुर वेबसाईट
AdvertisementAdvertisement

ओम्‍नीले नेपालमा भित्र्याएकै ब्रान्डको आरडीटी किट प्रयोगमा भारतमा लाग्यो रोक

सुरेशराज न्यौपाने

नयाँदिल्ली — भारतले चिनियाँ कम्पनी वन्डफो ब्राण्डका आरडीटी किटबाट परीक्षणको नतिजा विश्वसनीय नभएको भन्दै प्रयोगमा रोक लगाउने निर्णय गरेको छ ।

ओम्नी बिजनेस कर्पोरेट इन्टरनेसनल (ओबीसीआई) ले चीनबाट ल्याएको ग्वान्जाउ वन्डफो बायोटेक कम्पनीद्वारा उत्पादित ‘वन्डफो’ ब्राण्डको दु्रत परीक्षण किट (आरडीटी) खरिदका लागि नेपालका स्वास्थ्यसम्बद्ध राष्ट्रिय एवं अन्तर्राष्ट्रिय गैरसरकारी संस्थाहरुलाई दबाब दिइरहेका बेला यता भारतले भने उक्त ब्राण्डको आरडीटी किटको प्रयोगमा रोक लगाएको छ ।

ओम्नी बिजनेस कर्पोरेट इन्टरनेसनल (ओबीसीआई) ले स्वास्थ्य सेवा विभागसँगको सम्झौताभन्दा बढी ल्याएको २५ हजार आरडीटी खरिद गराउन सरकारी निकायहरुबाटै गैससमाथि दबाब दिएको कान्तिपुरले आजै (सोमबार) खुलासा गरेको छ । उक्त किटको मूल्य करिब तीन करोड रुपैयाँ बराबर छ ।

तर, भारतीय आर्युविज्ञान अनुसन्धान परिषद् (आईसीएमआर) ले वन्डफो ब्राण्डका आरडीटी परीक्षणको नतिजा विश्वसनीय नभएको भन्दै प्रयोगमा रोक लगाउने निर्णय गरेको हो । आईसीएमआरले ग्वान्जाउ वन्डफो बायोटेक र जुहाई लिब्जन ब्राण्डका आरडीटी किटको नतिजाप्रति विभिन्न राज्यहरुमा प्रश्न उठेपछि तिनीहरुको गुणस्तर परीक्षण गरेको थियो । उक्त परीक्षणको नतिजा विश्वसनीय नपाएपछि तिनको प्रयोग तत्काल बन्द गर्न र आपूर्तिकर्तालाई तत्काल फिर्ता गर्न आईसीएमआरले सूचना जारी गरेको छ । त्यसैगरी उसले कोभिड १९ को परीक्षणका लागि पीसीआर विधि नै भरपर्दो र उत्तम भएको समेत जनाएको छ ।

राजस्थान, पन्जाब, महराष्ट्रलगायतका राज्यहरुले आरडीटी किट्को विश्वसनीयमाथि प्रश्न उठाउँदै तिनको प्रयोगमा यसअघि नै रोक लगाइसकेका छन् । राजस्थान सरकारले आरडीटी किट्को नतिजाको विश्वसनीयता ५.४ प्रतिशत मात्र रहेको दाबी गरेको थियो । आरडीटी किटमाथि प्रश्न उठेपछि दिल्ली सरकारले त त्यसलाई प्रयोगमा नै ल्याएन ।

चीनमा उत्पादित आरडीटी किटको विश्वसनीयतामाथि भारतमा मात्र नभएर अन्य मुलुकहरुमा पनि प्रश्न उठ्दै आएको छ । स्पेनले त चीनमा उत्पादित आरडीटी किटको परीक्षण नतिजा ३० प्रतिशतको हाराहारीमा मात्र रहेको भन्दै किट नै फिर्ता गरेको थियो ।


प्रकाशित : वैशाख १६, २०७७ ०९:३५
प्रतिक्रिया
पठाउनुहोस्

थर्मल गनले जाँचेका भरमा सीधै घर

भरपर्दो जाँचबिना नै राजधानीबाट ठूलो संख्यामा मानिसहरु गाउँ भित्रेपछि कोरोना संक्रमणको जोखिम बढेको छ
शिव पुरी, शंकर आचार्य

रौतहट, पर्सा — लकडाउनमा काठमाडौंमा रोकिएका स्थानीयलाई ल्याउन रौतहटका पालिकाबीच होडबाजी चलेको छ । त्यसरी ल्याइएका सर्वसाधारणलाई क्वारेन्टाइनमा भने राखिएको छैन । उनीहरूलाई र्‍यापिड डायग्नोस्टिक टेस्ट (आरडीटी) नै नगरी थर्मल गनले जाँचेको भरमा घर जान दिने गरिएको छ ।

भरपर्दो जाँचबिना नै राजधानीबाट ठूलो संख्यामा व्यक्तिहरू गाउँ भित्रिएपछि कोरोना संक्रमणको जोखिम बढेको छ । लकडाउनका क्रममा कतिपय पैदलै आएका थिए । पछिल्लो साता पालिकाले उद्धारका लागि बस पठाएका हुन् । रौतहटका १८ स्थानीय तहमध्ये आधाजसोले बस रिजर्भ गरेर राजधानी पठाएर नि:शुल्क ल्याउने व्यवस्था गरेका हुन् । प्रमुख जिल्ला अधिकारी वासुदेव घिमिरेले काठमाडौंबाट आएको हुनाले उनीहरू सुरक्षित रहेको दाबी गरे ।

‘हामीले र्‍यापिड टेस्टको भर गरेनौं । राजधानीबाट भित्रिएकाको विवरण मागेका छौं,’ उनले भने, ‘उनीहरूलाई होम क्वारेन्टाइनमा बस्न र जनप्रतिनिधिलाई निगरानी गर्न भनेका छौं ।’ एक साताअघि जिल्ला प्रशासनमा बसेको सुरक्षा समितिको बैठकले लकडाउनले राजधानीमा अलपत्र परेकालाई स्थानीय तहले उद्धार गर्न सक्ने र उनीहरूलाई र्‍यापिड टेस्ट गरेर होम क्वारेन्टाइनमा राख्ने निर्णय गरेको थियो ।

जनप्रतिनिधिहरूले काठमाडौंबाट आएकालाई चन्द्रनिगाहपुरस्थित जंगलटोलमा ट्राफिक प्रहरीको रोहबरमा थर्मल गनले ज्वरो नापेर सीधै घर पठाउने गरेको पाइएको छ । ‘उनीहरू सबै स्वस्थ छन् । कसैलाई कोरोनाको संक्रमण छैन,’ चन्द्रपुर २ का वडाध्यक्ष बुद्ध लामाले भने,

‘काठमाडौंबाट आएका हुनाले कसैलाई केही भएकै छैन । होम क्वारेन्टाइनमा बस्न भनेका छौं । उनीहरूको हामी पनि निगरानी गर्छौं ।’

काठमाडौंबाट आएका इशनाथका सुरज रायले कतिखेर घर पुगौंला र चयनको श्वास फेरौंला जस्तो भएको सुनाए । ‘काठमाडौंमै बसेको भए भोकै मरिन्थ्यो । अब आफ्नै घरमा सुकेको रोटी भए पनि चित्त बुझाउँछौं । यसरी कष्टले आएपछि क्वारेन्टाइनमा बस्दैनौं । यसका लागि जे सजाय भोग्न तयार छौं ।’

लामो समय घरबाट टाढा भएकाहरू परिवारसँग भेट्न हतारमा भएकाले क्वारेन्टाइनमा बस्नै नमान्ने वृन्दावन नगरपालिकाका मेयर रामस्नेही रायले बताए । ‘आर्थिक र अन्य व्यवस्थापनको हिसाबले पनि क्वारेन्टाइन बसाइ स्थानीय तहका लागि झन्झटिलो हुने गर्छ,’ उनले भने,

‘अहिलेको मुख्य समस्या भनेकै उनीहरूलाई जतिसक्दो चाँडो घर फर्काउने र परिवारसित भेट गराउने हो । जोखिम भन्ने कुरा अहिलेको अवस्थामा हुनु स्वाभाविकै हो ।’ मेयर रायले बाहिरबाट उद्धार गरिएकालाई होम क्वारेन्टाइनमा राखेर जनप्रतिनिधिहरूले कडा निगरानी राख्नुपर्ने सुझाव दिए ।

भारतीयको व्यवस्थापनमा कठिनाइ

राजधानीलगायतबाट भारत घर जान लागेका ५५ जनालाई रौतहट प्रहरीले रोकेर विभिन्न क्वारेन्टाइनमा राखेको छ । उनीहरूको खानपिन र बसाइमा समस्या भएको स्थानीय प्रशासनले जनाएको छ । प्रशासनले क्वारेन्टाइन बसेका भारतीयलाई पनि खानपिन र बसोबासको प्रबन्ध मिलाउन भने पनि स्थानीय तहले बेवास्ता गर्ने गरेको पाइएको छ । प्रजिअ घिमिरेले पालिकाले भारतीयको हकमा बजेट नछुट्याएको गुनासो आएको बताए ।

‘हामीले गृह मन्त्रालयमा उनीहरूका लागि पनि बजेट माग गरेका छौं । लकडाउन अवधिभर पालिकाले व्यवस्था मिलाउनुपर्छ,’ उनले भने । उनले भारतीयलाई खानपिनमा समस्या परेको क्वारेन्टाइन र पालिकाको नाम भने खुलाएनन् ।

१२५ भारतीय क्वारेन्टाइनमा

पर्साको वीरगन्जस्थित ठाकुरराम क्याम्पसको क्वारेन्टाइनमा अझै १ सय २५ जना भारतीय नागरिक छन् । तीमध्ये ४ महिला छन् । राजधानी तथा अन्य जिल्लामा विभिन्न पेसामा आबद्ध रही भारतस्थित आफ्नो घर फर्कन भनी वीरगन्ज आएका उनीहरूलाई स्थानीय प्रशासनले नियन्त्रणमा लिई क्वारेन्टाइनमा राखेको हो । उनीहरूलाई घर पठाउनेबारे अझै टुंगो लागेको छैन जिल्ला प्रहरी कार्यालयका डीएसपी गौतम थापाले बताए ।

क्वारेन्टाइनमा रहेका भारतीयलाई खाने र बस्ने व्यवस्था गरिएको छ । वीरगन्जस्थित भारतीय महावाणिज्य दूतावासका अधिकारी पनि बेलाबेलामा उनीहरूको अवस्था बुझ्न त्यहाँ पुग्ने गरेका छन् । सीमावर्ती भारतीय सहर रक्सौलमा पनि यसरी एक दर्जन नेपाली क्वारेन्टाइनमा छन् । यसबाहेक वीरगन्जसहित जिल्लाका अन्य स्थानीय तहको क्वारेन्टाइनमा सोमबारसम्म १ सय २४ र होम क्वारेन्टाइनमा ३ सय २१ जना छन् ।

प्रकाशित : वैशाख १६, २०७७ ०९:०८
पूरा पढ्नुहोस्
प्रतिक्रिया
पठाउनुहोस्
×