गठबन्धनमा आ-आफ्नै ताल- स्थानीय तह निर्वाचन २०७९ - कान्तिपुर समाचार

गठबन्धनमा आ-आफ्नै ताल

मधेस ब्युरो

जनकपुर — सत्तारूढ दलले स्थानीय तह निर्वाचनमा गठबन्धन गरेर अगाडि बढ्ने गृहकार्य गरिरहेकै बेला मधेस प्रदेशमा भने ती दलभित्रै आ–आफ्नै तरिकाले चुनावी मैदानमा होम्मिने सहमति गर्न थालेका छन् । पर्सामा सत्तारूढ दलको बैठकले स्थानीय निर्वाचनमा आफ्नै तरिकाले छुट्टाछुट्टै निर्वाचनमा प्रतिस्पर्धा गर्ने सहमति गरेको छ । धनुषामा भने कांग्रेसले जनकपुरधाम उपमहानगरपालिकामा आफ्ना उम्मेदवार घोषणा गरिसकेको छ । 

सप्तरीमा पनि गत साता सत्ता साझेदार दलबीच सहमति नहुँदा चुनाव आ–आफ्नै तरिकाले लड्ने भएको छ । केन्द्रीय नेतृत्वको चाहना हुँदा पनि स्थानीय तहमा दलहरू गठबन्धन गर्ने सोचमा देखिन्नन् । चुनावी आँकडा विश्लेषण गरेर बसेका दल र उम्मेदवारहरू आफू नै जित्ने दाबीसहित गठबन्धन नगर्ने पक्षमा उभिएका हुन् ।

सर्लाहीमा भने अनिर्वाचनका लागि पाँचदलीय गठबन्धनबीचको तालमेलमा प्रगति शून्य छ । गठबन्धनमा औपचारिक छलफलका लागि तोकिएको समय सर्दै आएको छ । आइतबारका लागि तोकिएको छलफल सोमबारका लागि सारिएको छ । आफ्नै पार्टीभित्र मिलाउनुपर्ने भन्दै गठबन्धनमा आबद्ध दलले समय सार्दै आएका हुन् । अनौपचारिक रूपमा भने सबैसँग कुरा भइरहेको दलका नेताहरूले बताएका छन् ।

चुनावी तालमेलका लागि सर्लाही कांग्रेस जिल्ला सभापति सुरेन्द्र सिंहको संयोजकत्वमा एक कमिटी बनाइएको कांग्रेसका जिल्ला सचिव नीरज कार्कीले बताए । कार्कीले पहिला आफ्नै दलभित्र छलफल गर्नुपर्दा केही ढिलो भएको जनाउँदै छलफल पनि जारी रहेको जानकारी दिए । गठबन्धनमा आबद्ध दलले पालिकाहरूमा प्रमुख पद नै ताकेको भन्दै कार्कीले गठबन्धनका लागि दलहरू गम्भीर नभएको बताए । उनले गठबन्धनको प्रगति अहिलेसम्म शून्य रहेको जनाउँदै सोमबार फेरि गठबन्धनको बैठक बस्ने बताए ।

‘गठबन्धनको वार्ता भइरहेको छ । कुरा मिलाउन गाह्रो छ,’ उनले भने, ‘सबैको माग धेरैभन्दा धेरै पालिकामा मेयरकै भो, सबैलाई मेयर नै चाहियो भने कसरी मिल्न सक्छ ?’ गठबन्धनमा आबद्ध कतिपय दलले ०७४ को मत परिणामअनुसार जाने कुरा राखिरहेका छन्, भने कसैले अहिलेको अवस्था फरक रहेको बताइरहेका छन् ।

नेकपा एकीकृत समाजवादीसहित अन्य दलले पनि गठबन्धनको बैठक त्यति सकारात्मक नरहेको बताएका छन् । नेकपा एकीकृत समाजवादीका नेता चूडामणि वाग्लेले गठबन्धनमा आबद्ध दलले केन्द्रले लाद्यो भने त्यसैलाई मान्ने, नभए प्रमुख पद नछोड्ने मनस्थिति रहेको पाइएको बताए ।

‘स्थानीय तहको चुनावमा मेयर र उपमेयर मात्र भाइटल पोस्ट हो, एकले मेयर पाए, अर्कोले उपमेयरमा चित्त बुझाउन सक्छन्, अन्य तीन दल त वडामै झर्नुपर्छ,’ उनले भने, ‘यसको व्यवस्थापन गर्न गाह्रो हुन्छ, केन्द्रले नै तोकेर पठाइदिए हुन्थ्यो भन्ने मनस्थिति दलहरूमा देखिन्छ ।’

प्रकाशित : वैशाख ५, २०७९ ११:०२
प्रतिक्रिया
पठाउनुहोस्

उम्मेदवार छान्नै सकस

सत्ता गठबन्धन केन्द्रको निर्णय कुर्दै, तालमेल र आकांक्षी धेरै हुँदा एमालेमा पनि उम्मेदवार छनोटमा विलम्ब
सुवास विडारी, अनिश तिवारी

मकवानपुर, सिन्धुपाल्चोक — स्थानीय तह निर्वाचनको मिति नजिकिए पनि मकवानपुरमा चुनावी चहलपहल भने सुरु भएको छैन । सत्तारूढ र प्रतिपक्षी दलहरूबीच गठबन्धनका कारण उम्मेदवार टुंगो नलाग्दा वैशाख ३० मा हुने निर्वाचनको माहोल अझै सुरु नभएको हो ।

सत्तारूढ दल कांग्रेसको नेतृत्वमा रहेको माओवादी केन्द्र, नेकपा (एकीकृत समाजवादी), जनमोर्चा र जसपा सम्मिलित सत्ता गठबन्धनले अझैसम्म उम्मेदवारको टुंगो लगाउन सकेको छैन । प्रतिपक्षी दल एमाले र राप्रपा नेपालबीच गठबन्धन भए पनि आगामी कार्यदिशाबारे दुवै दल निचोडमा पुग्न सकेका छैनन् । उम्मेदवारी दर्ता गर्न अब एक साता मात्रै छ ।

एमालेले अधिकांश वडामा उम्मेदवार तय गरे पनि राप्रपा नेपालसँगको नयाँ समीकरणसँगै चुनावी कार्यक्रम अगाडि बढाउन सकेको छैन । मकवानपुर राप्रपा नेपालका अध्यक्ष कमल थापाको गृह जिल्ला हो । जसका कारण एमालेले आगामी कार्यदिशा तय गर्न सकेको छैन । राप्रपा नेपालका प्रतिनिधिसँग छलफल भइरहेकाले केही दिनभित्रै उम्मेदवार टुंगो लाग्ने एमाले मकवानपुर अध्यक्ष एकालाल श्रेष्ठले बताए ।

जिल्लामा हेटौंडा उपमहानगरसहित १ नगर र ८ गाउँपालिका छन् । उपमहानगरमा उम्मेदवार सत्ता र प्रतिपक्षी दुवैले केन्द्रबाटै टुंग्याउने निर्णय गरेका कारण पनि चुनावी चहलपहलका लागि केही समय अझै कुर्नुपर्ने देखिन्छ । अघिल्लो निर्वाचनमा एमाले ६ पालिकामा विजयी भएको थियो । कांग्रेस र माओवादीले २/२ पालिकाको नेतृत्व हत्याएका थिए । एमालेले पार्टी विभाजनको असर नपरेको दाबी गरे पनि एकीकृत समाजवादीको वडा तहैसम्म संरचना निर्माण भएको छ । कैलाश र इन्द्रसरोवर गाउँपालिकाका प्रमुखहरू टंक मोक्तान र जीवन लामा एकीकृत समाजवादीतर्फ खुलेका छन् ।

सत्तारूढ दलबीच पनि पटक–पटक बैठक भए पनि अन्तिम निर्णयका लागि केन्द्रकै निर्देशन पर्खिरहेका छन् । कांग्रेस मकवानपुर सभापति बुद्ध लामाले केन्द्रको निर्देशनअनुसार जिल्ला, पालिका र वडा तहमै गठबन्धनको संयन्त्र तयार गरिएको र सोहीअनुसार उम्मेदवार छनोट गरिने बताए । दलहरूले संघीय संरचना निर्माण गरे पनि निर्वाचनमा टिकट वितरणमा केन्द्र नै हावी हुने देखिएपछि जिल्लाका आकांक्षी नेताहरू काठमाडौं धाइरहेका छन् । एमाले नेता पनि विशेष गरी हेटौंडाको उम्मेदवार बन्न दौडधुप गरिरहेका छन् ।

भागबन्डामा आ–आफ्नै अडान

सिन्धुपाल्चोकमा ३ नगर र ९ गाउँपालिका छन् । तर, सत्ता गठबन्धनमा कांग्रेस र माओवादीले बराबर हिस्सा दाबी गर्दा उम्मेदवार छनोटमा अन्योल कायमै छ । आकांक्षी बढी हुँदा एमालेमा पनि उस्तै तनाव देखिन्छ । गत निर्वाचनमा जिल्लामा एमालेले ७, कांग्रेसले ३ र माओवादीले २ वटा पालिकामा जित हात पारेका थिए । यसपटक कांग्रेस, माओवादीलगायत ५ दलबीच गठबन्धन हुने भएपछि एमालेलाई विरासत जोगाउने चुनौती देखिन्छ । त्यसमाथि पार्टी विभाजनले समेत उसलाई थप सकस पर्ने देखिएको छ ।

‘तल्लो कमिटीबाट छनोट भएर आएका आकांक्षीको नाम सिफारिस गरेर पार्टीको माथिल्लो तहमा पठाइएको छ, आवश्यक छलफल हुँदै छ,’ एमाले जिल्ला अध्यक्ष कमल नेपालले भने । एमालेले भोटेकोसी गाउँपालिकाको अध्यक्षको उम्मेदवारमा अमृतकुमार खड्का र उपाध्यक्षमा सुन्तली लामा श्रेष्ठको नाम सर्वसम्मत चयन गरेको छ । बाह्रबिसे नगर प्रमुखको उम्मेदवारमा हालका प्रमुख निमफुञ्जो शेर्पा, युद्धविक्रम तामाङ डीबी र कल्याणी घिसिङको नाम सिफारिस गरिएको छ । उपप्रमुखमा सुशीला पाख्रिनको नाम सिफारिस गरे पनि अन्तिम निर्णय भइनसकेको अध्यक्ष नेपालले बताए ।

सत्ता गठबन्धनको केन्द्रीय संयन्त्रले ३ वैशाखभित्र उम्मेदवारको सिफारिस गर्न जिल्लालाई पत्राचार गरेको थियो । तर, जिल्ला तहमा दुवै दलका नेतृत्वबीच ३ पटक बैठक बसे पनि ठोस निर्णय हुन सकेको छैन । आगामी शनिबारसम्म उम्मेदवार टुंग्याउने योजनामा रहेको माओवादी केन्द्रका जिल्ला अध्यक्ष गोविन्द पराजुलीले बताए ।

गठबन्धनमा कांग्रेसका तर्फबाट बाह्रबिसेमा बालकृष्ण बस्नेत, त्रिपुरासुन्दरीमा भक्तध्वज बोहरा, सुनकोसीमा श्रवणकुमार जीसी र मेलम्चीमा आइतमान तामाङको नाम अघि सारिएको छ । त्यसैगरी, माओवादीबाट लिसंखुपाखरमा राजु लामा, बलेफीमा गंगा तामाङ, चौतारा साँगाचोकगढीमा कृष्णप्रसाद सापकोटा उम्मेदवार बन्ने सम्भावना रहेको बताइएको छ । ‘गठबन्धन दलबीच छलफल र बैठक निरन्तर चलिरहेको छ, हालसम्म ठोस निर्णय भएको छैन,’ कांग्रेस जिल्ला सभापति जगबहादुर तामाङले बताए ।

अघिल्लो निर्वाचनमा प्राप्त जितकै आधारमा कांग्रेसले एक सिट बढी पाउनुपर्ने दाबी गरेको छ । तर, मतभार पछिल्लो समय बढेको संगठनको आधारलाई मान्नुपर्ने दाबी गर्दै माओवादीले बराबरी सिट पाउनुपर्ने अडान छाडेको छैन । यसअघि एमालेले जितेका स्थानमा आफूहरूको उपस्थिति बलियो रहेको एकीकृत समाजवादीका नेताहरूले दाबी प्रस्तुत गरेका छन् । उसले कम्तीमा एक स्थानीय तहको नेतृत्व पाउनुपर्ने माग गरेको गठबन्धन बैठकमा निरन्तर सहभागी एक नेताले बताए । माओवादीले एकीकृत समाजवादीलाई आफ्नो भागबाट एक सिट दिनुपर्ने कांग्रेसको माग छ ।

प्रकाशित : वैशाख ५, २०७९ ११:०२
पूरा पढ्नुहोस्
प्रतिक्रिया
पठाउनुहोस्
×