प्रवासी मजदुरलाई सरकारले हेरेन : गान्धी

एजेन्सी

नयाँदिल्ली — भारतीय राष्ट्रिय कंग्रेसकी अध्यक्ष सोनिया गान्धीले केन्द्र सरकारले कोरोना भाइरस (कोभिड–१९) बाट पीडित प्रवासी मजदुरहरूको बेवास्ता गरेको आरोप लगाएकी छन् ।

भारतीय कंग्रेसले सञ्चालन गरेको ‘स्पिक अप इन्डिया’ अभियानका सन्दर्भमा जारी भिडियो सन्देशमा गान्धीले महामारीका कारण प्रभावित हरेक समुदायको समस्याप्रति संवेदनशील बन्न सरकारलाई सुझाव दिएकी छन् ।

सम्बोधनका क्रममा गान्धीले तत्काल राहतको आवश्यकता परेकालाई प्रतिपरिवार १० हजार भारतीय रुपैयाँ उपलब्ध गराउन तथा आगामी ६ महिनासम्म प्रतिपरिवार ७ हजार ५ सय रुपैयाँका दरले सहयोगको व्यवस्था गर्न आग्रह गरिन् ।

‘कंग्रेसले भारतको आवाज उठाउन यो सामाजिक अभियान गर्ने निर्णय गरिसकेको छ । आवश्यकता परेकालाई उपलब्ध गराउने गरी कोष खुला गर्न र राहत प्रदान गर्न हामी फेरि केन्द्र सरकारलाई आग्रह गर्छौं,’ गान्धीले भनिन् ।

राहत रकमका साथै प्रवासी मजदुरहरूको सुरक्षित र नि:शुल्क यात्राका लागि व्यवस्था गर्न तथा उनीहरूलाई आवश्यकताअनुसार सरकारले खाद्यान्नको प्रबन्ध गर्नुपर्नेसमेत गान्धीको माग छ ।

महात्मा गान्धी राष्ट्रिय ग्रामीण रोजगार सुनिश्चित ऐन, २००५ ले व्यवस्था गरेअनुरूप मजदुरलाई गाउँमै दुई सय दिन काम गर्ने अवसर सुनिश्चित गर्नसमेत उनले सरकारसँग माग गरेकी छन् ।

भाइरसको महामारीका कारण लाखौंले रोजगार गुमाउनुका साथै किसानहरूले आफ्नो उत्पादन बजारसम्म पुर्‍याउनसमेत नपाउँदा पनि सरकार चुपचाप बसेको उनको भनाइ छ । 

प्रकाशित : जेष्ठ १६, २०७७ ०७:००
प्रतिक्रिया
पठाउनुहोस्

भक्तपुरकी कोरोना संक्रमित वडा महिला सदस्य कोरोनामुक्त

कान्तिपुर संवाददाता

भक्तपुर — भक्तपुर नगरपालिका–९ वडाकी महिला सदस्य कोरोना भाइरस (कोभिड–१९) मुक्त भएर अस्पतालबाट डिस्चार्ज भएकी छन् । शुक्रबार कोरोना पुष्टि भएकी ४२ वर्षीया वडा महिला सदस्य पाटन अस्पतालबाट बिहीबार डिस्चार्ज भएको भक्तपुर–९ वडाका वडाध्यक्ष रविन्द्र ज्याख्वले बताए । 

जेठ ६ मा भक्तपुर नगरपालिकाद्धारा संचालित जनस्वास्थ्य केन्द्र च्याम्हासिंहले संकलन गरेको ‘नोजल स्वाब’ टेकुस्थित राष्ट्रिय जनस्वास्थ्य प्रयोगशालामा गरिएको परिक्षणमा उनको कोरोना पुष्टि भएको थियो । ती महिलाको परीक्षणको रिपोर्ट पोजिटिभ आएपछि पाटन अस्पतालको कोभिड आईसीयू ब्लकमा भर्ना गरिएको थियो । पाटन अस्पतालमा बुधबार र बिहीबार गरिएको कोरोना परिक्षणको रिपोर्ट नेगेटिभ आएपछि डिस्चार्ज गरेको वडाध्यक्ष ज्याख्वले बताए ।

वडा महिला सदस्यलाई कोरोना पुष्टि भएपछि भक्तपुर नगरले जनप्रतिनिधि, कर्मचारी, स्वास्थ्यकर्मीलगायत १ सय ६८ जनाको पीसीआर परिक्षण गराएको छ । जसमध्ये, जसमध्ये १ सय २० जनाको रिपोर्ट आइसकेको नगरपालिकाले जनाएको छ ।

प्रकाशित : जेष्ठ १६, २०७७ ०६:५७
पूरा पढ्नुहोस्
प्रतिक्रिया
पठाउनुहोस्
×