चीनले यस वर्ष आर्थिक वृद्धिदरको लक्ष्य तय नगर्ने

एजेन्सी

बेइजिङ — चीनले यस वर्ष आर्थिक वृद्धिदरको लक्ष्य तय नगर्ने भएको छ । शुक्रबार बिहानदेखि सुरु भएको चिनियाँ संसद्को वार्षिक बैठकमा प्रधानमन्त्री ली खछ्याङले आगामी वर्षका लागि आर्थिक वृद्धिदरको लक्ष्य तय नगर्ने बताएका छन् ।

प्रधानमन्त्री खछ्याङले भने, ‘हाम्रो देश केही समस्यासँग जुधिरहेको छ । यस्तो अनिश्चिततापूर्ण समयमा प्रगतिको अनुमान लगाउन कठिन हुन्छ । यो अनिश्चितता कोरोना भाइरसका कारण पैदा भएको हो । यसले विश्वकै अर्थव्यवस्था र व्यवसायमा ठूलो प्रभाव पारेको छ ।’

त्यस्तै चीनको बजेट घाटा पनि गत वर्षको तुलनामा बढेको बताइएको छ । चीनले सन् १९९० देखि आर्थिक वृद्धिदरको लक्ष्य प्रकाशित गर्न थालेको थियो । त्यसयता लगातार चीनले आफ्नो आर्थिक वृद्धिदर घोषणा गर्दै आएको थियो । यस वर्ष पहिलो पटक चीनले आर्थिक वृद्धिदरको लक्ष्य तय नगर्ने भएको हो ।

गत वर्ष चीनले ६ प्रतिशतदेखि ६.५ प्रतिशतसम्मको आर्थिक वृद्धिदरको लक्ष्य तय गरेको थियो । चीनमा गत वर्ष कुल ग्राहस्थ उत्पादन(जीडीपी) ३० वर्षयताकै कम ६.१ प्रतिशतले वृद्धि भएको थियो ।

त्यस्तै कोरोना महामारीका कारण महिनौंसम्मको लकडाउन र व्यावसायिक प्रतिष्ठानहरु बन्द गरिएकाले यस वर्षको पहिलो त्रैमासिकमा चीनको जीडीपी ६.८ प्रतिशतमै संकुचित भएको थियो । सन् १९७६ पछिको यो सबैभन्दा ठूलो संकुचन थियो ।

कोरोना महामारीका बीच अमेरिकासँगको व्यापारिक तथा कूटनीतिक टकरावले आगामी वर्ष चिनियाँ अर्थतन्त्रमा अझ असर पर्न सक्ने अर्थशास्त्रीहरु बताउँछन् ।

शुक्रबारदेखि सुरु भएको वार्षिक संसदीय बैठक(नेसनल पिपल्स कंग्रेस) मा करिब तीन हजार प्रतिनिधि सहभागी छन् । यही बैठकले आगामी बजेटलाई अनुमोदन गर्ने र आर्थिक वृद्धिदरको लक्ष्य तय गर्ने प्रचलन छ ।

कोरोना भाइरसको उद्गमस्थल मानिएको चीनमा अहिलेसम्म ८४ हजार ६३ जनामा संक्रमण पुष्टि भएको छ भने ४ हजार ६ सय ३८ जनाको मृत्यु भएको छ । चीनमा संक्रमितमध्ये ७९ हजार ३ सय १० जना निको भएका छन् । चीनमा पछिल्लो समय संक्रमण न्यून भएको छ ।

प्रकाशित : जेष्ठ ९, २०७७ ११:१४
प्रतिक्रिया
पठाउनुहोस्

दिल्लीमा उपचार गराएर फर्केका थिए चितवनका संक्रमित

रमेशकुमार पौडेल

चितवन — शुक्रबार बिहान कोरोना भाइरसको संक्रमण पुष्टि भएकामध्ये चितवनका दुई जनामध्ये एक जना भारतको दिल्लीमा क्यान्सर रोगको उपचार गराएर फर्केका व्यक्ति भएको खुलेको छ ।

संक्रमण पुष्टि भएका भरतपुर महानगरपालिका–६ केशरबागका ७४ वर्षीय पुरुष राजिव गान्धी क्यान्सर अस्पतालमा उपचार गराउन भारत गएका थिए । संक्रमित अर्की ७३ वर्षीया महिला उनैकी श्रीमती हुन् । उनी पनि श्रीमान्‌को उपचारका लागि सँगै दिल्ली गएकी थिइन् ।

संक्रमित दुवै जनालाई भरतपुरको कोरोना विशेष अस्थायी अस्पतालमा राखिएको छ । सो अस्पतालको समेत व्यवस्थापन सम्हालेको भरतपुरको सरकारी अस्पतालका प्रमुख मेडिकल सुपेरिटेन्डेन्ट डा.श्रीराम तिवारीले संक्रमितको स्वास्थ्य अवस्था सामान्य रहेको बताए । शुक्रबार नै कोरोना पुष्टि भएका नवलपुरका विनयी त्रिवेणी गाउँपालिका–६ का ४५ वर्षीय पुरुषलाई पनि सोही अस्पतालमा ल्याएर राखिएको छ ।

भरतपुरका संक्रमित व्यक्तिहरु दिल्लीबाट एम्बुलेन्समा जेठ ३ गते घर आएका थिए । ‘दिल्लीबाट कृष्णनगरसम्म भारतको एम्बुलेन्स र त्यहाँबाट नेपालको एम्बुलेन्समा आएको भन्ने बुझिएको छ । यहाँ आएपछि उहाँहरु पूर्ण सावधानीका साथ होम क्वारेन्टाइनमा हुनुहुन्थ्यो,’ भरतपुर महानगरपालिका–६ का वडाध्यक्ष हरिबिलास कोइरालाले भने । उनीहरुसँग प्रत्यक्ष सम्पर्कमा रहेका व्यक्तिहरुको सोधीखोजी सुरु भएको छ ।

‘भारतबाट फर्केपछि उहाँहरु घरमै सुरक्षित तरिकाले रहेको भन्ने छ । त्यही पनि हामी आजदेखि थप कुराहरु बुझ्ने प्रक्रियामा छौं । मिहीन तरिकाले नै कन्ट्याक्ट ट्रेसिङको काम हुने छ।’ भरतपुर महानगरपालिकाको जनस्वास्थ्य शाखाका प्रमुख दीपक सुवेदीले भने । अर्का संक्रमित नवलपुरका व्यक्ति जेठ १ गते भारतको गुजरातबाट घर आएको बुझिएको छ ।

चितवनमा अहिलेसम्म एक हजार २६३ जनाको स्वाब परीक्षण भएको छ । जसमध्ये ६ जनामा कोरोना भाइरसको संक्रमण पुष्टि भएको छ । संक्रमण पुष्टि भएकामध्ये चितवनका दुईजना उपचारपछि निको भएर घर फर्केका छन् । उपचारमा रहेका चारजना मध्ये दुईजना चितवन र दुई जना नवलपरासी पूर्वका हुन् । चैत्र २३ पछि स्वाबको पीसीआर परीक्षण भरतपुरमै हुने गरेको छ ।

सम्बन्धित समाचार

सर्लाहीका १५ सहित थप ३० जनामा कोरोना, संक्रमितको संख्या ४८७ पुग्यो

प्रकाशित : जेष्ठ ९, २०७७ १०:२०
पूरा पढ्नुहोस्
प्रतिक्रिया
पठाउनुहोस्
×