नवलपरासी — ४० वर्षीया रिगला यादव एमालेको समानुपातिक सूचीबाट प्रतिनिधिसभा सदस्यमा चुनिएकी छन् । उनी मधेशी महिला क्लस्टरबाट सांसद चुनिएकी हुन् । एमालेले उनको नाम मधेशी महिला क्लस्टरको एक नम्बरमा राखेको थियो ।

उनी नवलपरासी पश्चिममा भाडामा लिएकोसहित गरेर १६ बिगाह जग्गामा खेतीपाती गर्दै आएकी छन् । व्यवसायिक रुपमा खेतिकिसानी गर्दै आएकी यादव पार्टीले दिएको जिम्मेवारीलाई इमान्दरिताका साथ पूरा गर्ने बताउँछिन् । खेतिपाती मात्रै होइन् उनले २५ जनालाई रोजगारी दिनेगरी नेपाल गार्मेन्ट प्रालि पनि सन्चालन गरेकी छन् ।

उनले भनिन्, '२२ वर्षदेखि सक्रिय राजनीतिमा पनि छु । राजनीतिमार्फत समाजमा जोडिएकी छु । यही कारण पार्टीले मलाई  समानुपातिक सूचीकाे एक नम्बरमा राखेर सांसद् बनाएको होला ।' खेती र गार्मेन्टमा गरेर ७० भन्दा बढीलाई उनले रोजगारी दिएकी छन् । 

उनी पार्टीभित्रका विभिन्न द्वन्द्वबाट खारिएकी महिला नेतृ हुन् । प्रष्ट वक्ता र हक्की स्वभाव अनि राजनीति र समाजसेवामा निरन्तर सक्रियता उनको विषेशता हो । २०७० सालमा तत्कालीन नवलपरासी क्षेत्र नम्बर ६ मा एमालेबाट संविधानसभा सदस्य निर्वाचनमा उम्मेदवार थिइन् । यद्यपि, उनी पराजित भएकी थिइन् । २०७९ सालको स्थानीय तह निर्वाचनमा पाल्ही नन्गदन गाउँपालिकाबाट उपाध्यक्षमा उम्मेदवारी दिएकी यादव त्यहाँ पनि पराजित भएकी थिइन् ।