कपिलवस्तु — संविधानका जानकार मोहनलाल आचार्य कानुन निर्माण गर्न सर्वोच्च थलो संघीय संसद‍्मा पुगेका छन् अहिलेसम्म कानुन बनाउन आवश्यक सल्लाह दिँदै आएका उनी आफैं ऐन–कानुन निर्माण गर्ने थलोमा पुगेका हुन् । कपिलवस्तु–१ मा रास्वपाबाट उम्मेदवार बनेका उनले भारी मतान्तरको जित हात पार्दै संसदीय यात्रा सुरु गरेका छन् ।

कपिलवस्तु–१ मा २०४८ देखिको एमाले र कांग्रेसको विरासत उनले तोडेका हुन् । विशेषज्ञका रूपमा काम गरिरहेका आचार्य गत भदौको जेन–जी आन्दोलनपछि मुलुकलाई निकास दिनका लागि रास्वपा प्रवेश गरेर संसदीय यात्रा सुरु गरेको उनले बताए ।  

यहाँ दुई नयाँ अनुहारबीच प्रतिस्पर्धा भयो । आचार्य १८ हजार २ सय ८८ मतान्तरले विजयी भए । आचार्यले ३४ हजार १ सय ४८ मत पाउँदा उनका निकतटम प्रतिस्पर्धी स्वतन्त्र उम्मेदवार आशिष शर्माले १५ हजार ८ सय ६० मत प्राप्त गरेका थिए । पार्टीबाट टिकट नपाएपछि कांग्रेस नेता शर्माले स्वतन्त्र उम्मेदवारी दिएका थिए । शर्मा पनि बैंक तथा वित्तीय संस्थामा सुशासनका जानकार र युवा उद्यमी हुन् । तीन क्षेत्रमध्ये विकासका पूर्वाधर अपेक्षाकृत बढी रहेको क्षेत्र नं १ मा दलबाट १९ जना र १४ स्वतन्त्र उम्मेदवारलाई पराजित गर्दै आचायले विजयीको माला पहिरिएका हुन् । 

यस क्षेत्रमा ३ जना संविधानसभा सदस्य चुनावी प्रतिस्पर्धामा हुँदा निर्वाचन अझ पेचिलो बनेको थियो । चुनावका अनुभवी नेता, हाइड्रोपावर विशेषज्ञ, तत्कालीन माओवादी जनमुक्ति सेनाका कमाण्डर र युवा उद्यमीसँग प्रतिस्पर्धा गर्न कठिन भए पनि उनले जनताको भारी मत प्राप्त गरी संसद्को यात्रा तय गरेका हुन् । दुई विषयमा स्नातकोत्तर गरेका आचार्य चुनावी प्रचारका दौरान मतदाताका तिखा प्रश्नको सामना गर्दै ज्ञान र विज्ञता भएकालाई काम गर्न अवसर दिनुपर्ने बताउँदै आएका थिए ।

पहिलो पटक प्रतिनिधिसभा सदस्य उम्मेदवार बनेका उनीसित संविधानसभाको विशेषज्ञ भएर सात वर्ष काम गरेको अनुभव छ । उनीसँग प्रधानमन्त्री तथा मन्त्रिपरिषद‍्को कार्यालय, संघीय मामिला मन्त्रालय, कानुन, न्याय तथा संसदीय मामिला मन्त्रालय, स्वास्थ्य तथा जनसंख्या र कृषि मन्त्रालयलगायत विभिन्न सरकारी निकायका लागि कानुन निर्माण, अध्ययन–अनुसन्धान तथा बनेका कानुनको विधायिकी परीक्षणमा काम गरेको अनुभव छ । वाणगंगा नगरपालिका–४ सिद्धिपुरका ५३ वर्षे आचार्यले अन्तर्राष्ट्रिय कानुन र समाजशास्त्र विषयमा स्नातकोत्तर गरेका छन् । 

संघ,  प्रदेश र स्थानीय तहमा कानुन तर्जुमा, स्थानीय न्यायिक समितिको सुदृढीकरण तथा विशेष क्षमता अभिवृद्धि तालिममा विषयविज्ञ आर्चायले आफूले कृषिलाई प्राथमिकता दिएको बताए । कृषकको सम्मान, सिँचाइ र मलखादको सहज पहुँच पुर्‍याउने उनले बताए ।