२०३५ सालमा जन्मिएका ४७ वर्षीय रोकाया सिमकोट गाउँपालिकास्थित तल्लोगाउँका बासिन्दा हुन् । उनले एसएलसीसम्मको अध्ययन पूरा गरेका छन् । गत प्रतिनिधिसभा निर्वाचनमा पूर्वमाओवादीका छिरिङ डम्डुल लामा (भोटे) विजयी भएका थिए भने २०७४ को निर्वाचनमा स्वतन्त्र उम्मेदवार छक्कबहादुर लामाले निर्वाचन जितेका थिए । पछि उनी माओवादी केन्द्रमा प्रवेश गरे । दोस्रो संविधानसभाको निर्वाचनमा क्षेत्र नं १ बाट कांग्रेसका जीवनबहादुर शाही निर्वाचित भएका थिए । त्यसयता हुम्लामा प्रतिनिधिसभा सदस्यमा कांग्रेस उम्मेदवार विजयी हुन सकेका थिएनन् । 

यस पटक विजयी भएसँगै रोकायाले पिछडिएको जिल्लाको आवाज संसद‍्सम्म पुर्‍याउने र जिल्लालाई समृद्ध बनाउन आफूले पहल गर्ने बताए । ‘हुम्लालाई मूलधारको राजनीतिसँग जोड्दै यहाँका भौगोलिक, सामाजिक, आर्थिक समस्या समाधानका लागि मेरो पहल हुनेछ,’ उनले भने, ‘भावनात्मक राजनीति होइन, परिणाम देखिने गरी काम गर्न संसद‍्मा क्रियाशील हुनेछु ।’