दैलेख–१ मा महासमिति सदस्य वासना थापा १२ हजार ३७२ मतसहित विजयी भएसँगै कांग्रेसले १२ वर्षपछि आफ्नो विरासत फर्काएको छ । थापाले २०५७ सालदेखि नेपाल विद्यार्थी संघबाट राजनीति सुरु गरेकी थापा कांग्रेसको १३औं र १४औं महाधिवेशनमा महाधिवेशन प्रतिनिधि बनेकी थिइन् ।

सुर्खेत–१ मा कांग्रेसका जिल्ला उपसभापति विष्णुबहादुर खड्का २६ हजार ८९७ मत ल्याइ विजयी भएर कांग्रेसको लामो विरासत कायम राखेका छन् । उनी कांग्रेस पूर्व कार्यवाहक सभापति पूर्णबहादुर खड्काका साइला भाइ हुन् । पूर्णबहादुरले यही क्षेत्रबाट २०४८ सालदेखि निर्वाचन जित्दै ५ पटक सांसद बनेका थिए । पूर्णबहादुर २०७४ सालमा यही क्षेत्रबाट पराजित भए भने एकपटक समानुपातिक सांसद बने । नवनिर्वाचित सांसद खड्काले २०३६ सालमा बहुदलको पक्षमा उभिएर राजनीति सुरु गरेका थिए । 

मुगुमा कांग्रेस जिल्ला सभापति खडक शाही ७ हजार ९२४ मतसहित विजयी बन्दै पार्टीको विरासत कायम गरे । २०४६ सालदेखि राजनीतिमा सक्रिय उनी २०५२ सालमा कांग्रेस जिल्ला उपसभापति बने । २०७२ सालमा कांग्रेस जिल्ला सभापति निर्वाचित भएका उनी २०५२ सालदेखि निरन्तर कांग्रेस महाधिवेशन प्रतिनिधि छन् ।

दोस्रो संविधानसभा निर्वाचन २०७० मा ७ वटा निर्वाचन क्षेत्र जितेको कांग्रेस २०७४ सालमा शून्य सिटमा झरेको थियो । प्रतिनिधिसभा निर्वाचन २०७९ मा सुर्खेतका दुईवटै, मुगु र दैलेख–१ गरी ४ स्थानमा कांग्रेस उम्मेदवार निर्वाचित भएका थिए ।